វេទិកាពលរដ្ឋទាមទារឱ្យលោក ហ៊ុន សែន បើកទូលាយដល់ពលរដ្ឋខ្មែរដែលចង់ចូលទៅមើលបង្គោលព្រំដែនកម្ពុជា-វៀតណាម អាចចូលទៅមើលដោយសេរីដូចអាជ្ញាធរវៀតណាម បើកឱ្យពលរដ្ឋ និងសិស្សសាលារបស់គេដែរ។
នៅក្នុងលិខិតចំហចុះថ្ងៃទី២៣ ខែឧសភា ឆ្នាំ២០២២ វេទិកាពលរដ្ឋដែលមានមូលដ្ឋាននៅសហរដ្ឋអាមេរិក ឱ្យដឹងថា ពួកគេស្វាគមន៍ចំពោះប្រសាសន៍របស់លោក ហ៊ុន សែន ដែលបានថ្លែងទៅកាន់ពលរដ្ឋខ្មែរ-អឺរ៉ុបនៅទីក្រុងដាវ៉ូស ប្រទេសស្វីស កាលពីថ្ងៃទី២១ ខែឧសភា ឆ្នាំ២០២២។
ប្រភពដដែលឲ្យដឹងថា ផ្អែកតាមប្រសាសន៍របស់លោក ហ៊ុន សែន ពលរដ្ឋខ្មែរគ្រប់និន្នាការ ទាំងក្នុង និងក្រៅប្រទេសមានសិទ្ធិសេរីភាពពេញលេញក្នុងការចុះទៅមើលខ្សែបន្ទាត់ព្រំដែន និងបង្គោលព្រំដែនដែលបោះរួចហើយជាមួយប្រទេសជិតខាងទាំងអស់ ដោយមិនមានភាពតឹងតែងហួសហេតុពេករហូតដល់គំរាមកំហែងធ្ងន់ៗ និងចាប់ដាក់គុកទាំងបំពានដូចករណីមុនៗទៀតឡើយ។
ដើម្បីបញ្ជាក់ថា ការថ្លែងរបស់លោក ហ៊ុន សែន អាចយកជាការបានមែន នោះពួកគេស្នើសុំចំណារអនុញ្ញាតដោយផ្ទាល់ពីលោកនាយករដ្ឋមន្ត្រីក្នុងការយល់ព្រមឱ្យវេទិកាពលរដ្ឋអាចចាត់តំណាងទៅពិនិត្យមើលខ្សែបន្ទាត់ព្រំដែន និងបង្គោលទាំងឡាយណាដែលរដ្ឋាភិបាលលោក ហ៊ុន សែន បានសម្រេចជាផ្លូវការកន្លងមកជាមួយនឹងប្រទេសជិតខាង។
ជាមួយគ្នានេះ វេទិកាពលរដ្ឋទាមទាររដ្ឋាភិបាលដែលដឹកនាំដោយលោក ហ៊ុន សែន បើកទូលាយដល់ពលរដ្ឋខ្មែរដែលចង់ចូលទៅមើលបង្គោលព្រំដែនកម្ពុជា-វៀតណាម ដូចអាជ្ញាធរវៀតណាម បើកឱ្យពលរដ្ឋ និងសិស្សសាលារបស់គេចូលដែរ។
វេទិកាពលរដ្ឋបញ្ជាក់ថា មូលហេតុដែលវេទិកាពលរដ្ឋស្នើសុំដូច្នេះ ដោយសារបញ្ហាទឹកដីព្រំដែនជារឿងជាតិទាំងអស់គ្នាដែលពលរដ្ឋគ្រប់រូបត្រូវរួមគ្នាទទួលខុសត្រូវ។ វេទិកាពលរដ្ឋមានក្ដីសង្ឃឹមថា លោក ហ៊ុន សែន នឹងមិនបដិសេធសំណើរបស់វេទិកាពលរដ្ឋឡើយ ដោយសារនេះជាស្មារតីជាតិ ស្របតាមកិច្ចព្រមព្រៀងសន្តិភាពក្រុងប៉ារីស ថ្ងៃទី២៣ ខែតុលា ឆ្នាំ១៩៩១ និងរដ្ឋធម្មនុញ្ញកម្ពុជា។
ការស្នើរបស់វេទិកាពលរដ្ឋនេះ ធ្វើឡើងបន្ទាប់ពីលោក ហ៊ុន សែន ថ្លែងកាលពីថ្ងៃទី២១ ខែឧសភា ឆ្នាំ២០២២ ថា បើគង់តែឱ្យដីគេដដែល មិនចាំបាច់ទៅចរចានោះទេ។ លោកអះអាងទៀតថា លោកមិនកាត់ដីខ្មែរឱ្យប្រទេសជិតខាងសូម្បីមួយមិល្លីម៉ែត្រដូចការចោទប្រកាន់របស់មជ្ឈដ្ឋានមួយចំនួនឡើយ។
បើតាមលោក ហ៊ុន សែន អះអាងថាការបោះបង្គោលព្រំដែនកម្ពុជា-វៀតណាមសម្រេចបាន ៩០% ទៅហើយ ដោយឡែកនៅសល់តែ ១០% ទៀត ភាគីទាំងពីរកំពុងចរចាគ្នាដើម្បីឈានទៅដល់បោះបញ្ចប់ ឬរួចរាល់ ១០០% នាពេលខាងមុខនេះ។
យ៉ាងណាក៏ដោយ អនុប្រធានវេទិកាពលរដ្ឋ និងជាប្រធានក្រុមប្រឹក្សាឃ្លាំមើលកម្ពុជានៅប្រទេសន័រវែស លោក ម៉ែន ណាត បានចាត់ទុកការបោះបង្គោលព្រំដែនបច្ចុប្បន្នធ្វើឡើងផ្ទុយពីមាត្រា២ និងមាត្រា៥៥ នៃរដ្ឋធម្មនុញ្ញកម្ពុជា រួមទាំងកិច្ចព្រមព្រៀងសន្តិភាពទីក្រុងប៉ារីសផងដែរ។
លោក ម៉ែន ណាត អះអាងថា បើទោះបីជាលោក ហ៊ុន សែន ខំបោះបង្គោលព្រំដែនបាន ១០០% ក្ដី ប៉ុន្តែវាមិនអាចបញ្ចប់បញ្ហាជម្លោះបានឡើយ បើសិនការបោះបង្គោលព្រំដែនមានភាពមិនប្រក្រតីនោះ។ កម្ពុជា មានសិទ្ធិក្នុងការសើរើឡើងវិញបានដោយនិរាករណ៍ឯកសារច្បាប់ទាំងឡាយដែលផ្ទុយពីរដ្ឋធម្មនុញ្ញកម្ពុជា និងកិច្ចព្រមព្រៀងសន្តិភាពទីក្រុងប៉ារីស៕