ក្រុមអ្នកតស៊ូមតិនៅក្រៅស្រុក ថារដ្ឋាភិបាលកម្ពុជាគ្មានជម្រើសផ្សេងក្រៅពីបើកលំហប្រជាធិបតេយ្យតាមរយៈនៃការផ្តល់សិទ្ធិសេរីភាពនយោបាយពេញលេញឡើងវិញដល់មេដឹកនាំបក្សប្រឆាំង លោក កឹម សុខា នោះឡើយ ដើម្បីទទួលបានអត្ថប្រយោជន៍រាប់ពាន់លានដុល្លារពីសហភាពអឺរ៉ុប និងសហរដ្ឋអាមេរិកបន្តទៀត។
អនុប្រធានវេទិកាពលរដ្ឋ លោក ម៉ែន ណាត ប្រាប់សារព័ត៌មាន The Cambodia Daily នៅថ្ងៃទី២៣ ឧសភា នេះថា តាមសកម្មភាពខ្លះៗរបស់មេដឹកនាំបក្សកាន់អំណាច លោក ហ៊ុន សែន ក្នុងរយៈពេលចុងក្រោយនេះ តាមរយៈនៃការជួលក្រុមហ៊ុនបញ្ចុះបញ្ចូលដើម្បីស្ដារទំនាក់ទំនងជាមួយសហរដ្ឋអាមេរិក ពីព្រោះកម្ពុជាពិតជាចង់សម្របខ្លួនតាមការចង់បានរបស់អាមេរិកខ្លះដែរ ប៉ុន្តែកំហុសដែលមេបក្សកាន់អំណាចបានប្រព្រឹត្តលើលោក កឹម សុខា ជាកំហុសដ៏ធំដែលពិបាកនឹងស្ដារឡើងវិញនៅពេលនេះ។
លោក ម៉ែន ណាត អះអាងថា ស្ថានភាពជាក់ស្តែងនៅពេលនេះ សហគមន៍អន្តរជាតិកំពុងផ្តល់តម្លៃលើលោក កឹម សុខា ជាមេដឹកនាំតំណាងឱ្យឆន្ទៈអ្នកចង់បានលទ្ធិប្រជាធិបតេយ្យ ដូច្នេះគាត់មិនអាចបន្តសកម្មភាពនយោបាយស្ងៀមស្ងាត់ពេកនោះទេ ព្រោះថាលោក ហ៊ុន សែន ពេលនេះអាចនឹងកំពុងប្រើស្ថានភាពរបស់លោក កឹម សុខា ពន្យារពេលក្នុងការប្រើលេសជាមួយសហគមន៍អន្តរជាតិ ដើម្បីរង់ចាំដំណោះស្រាយមួយដែលគាត់កំពុងបង្កើតឡើងសម្រាប់ភាពទាល់ច្រករបស់រដ្ឋាភិបាលឯកបក្សសព្វថ្ងៃនេះ។
អនុប្រធានវេទិកាពលរដ្ឋរូបនេះបញ្ជាក់ថា អ្វីដែលលោក ហ៊ុន សែន ចង់បាននោះ គឺកម្លាំងគាំទ្ររបស់លោក កឹម សុខា ថយចុះ និងការបែកខ្ញែកគ្នា ហើយលោក កឹម សុខា ក៏មិនអាចវិលចូលឆាកនយោបាយវិញបានទៅថ្ងៃមុខ ព្រោះលទ្ធផលបែបនេះគឺមានប្រយោជន៍ធំធេងសម្រាប់កូនប្រុសរបស់គាត់ដែលជាបេក្ខជននាយករដ្ឋមន្ត្រីនៅថ្ងៃអនាគត។ ដូច្នេះ លោក កឹម សុខា ត្រូវស្គាល់ពីបំណងរបស់លោក ហ៊ុន សែន ឱ្យច្បាស់ ហើយដឹកនាំនយោបាយដោយការប្រុងប្រយ័ត្ន និងផ្លាស់ប្ដូរបត់បែនតាមស្ថានភាពនយោបាយដែលបក្សកាន់អំណាចកំពុងរៀបចំនេះ។
កាលពីថ្ងៃទី២២ ខែឧសភា ឆ្នាំ២០២២ ឯកអគ្គរដ្ឋទូតអាម៉េរិកប្រចាំនៅកម្ពុជា លោក ផាទ្រិក មើលហ្វី (W. Patrick Murphy) បានសរសេរលើបណ្ដាញសង្គមធ្វីតធឺ (Twitter) របស់លោកថា លោកមានសេចក្តីរីករាយដែលបានជួបជាមួយប្រធានគណបក្សសង្គ្រោះជាតិ លោក កឹម សុខា ដើម្បីពិភាក្សាអំពីព្រឹត្តិការណ៍ថ្មីៗនៅកម្ពុជា។
លោក ផាទ្រិក មើលហ្វី លើកឡើងថា ក្នុងនាមលោកតំណាងឱ្យសហរដ្ឋអាមេរិក នៅតែខកចិត្តចំពោះសវនាការដែលមានចរិតនយោបាយរបស់មេដឹកនាំបក្សប្រឆាំងដែលនៅតែអូសបន្លាយដោយគ្មានដំណោះស្រាយ ក្នុងនោះលោកបញ្ជាក់ថា កម្ពុជានឹងទទួលបានផលប្រយោជន៍ពីការស្ដារនីតិសម្បទានៃសិទ្ធិនយោបាយរបស់លោក កឹម សុខា ឡើងវិញផងដែរ ប្រសិនបើកម្ពុជាធ្វើឱ្យមាននូវលំហប្រជាធិបតេយ្យនេះ។
ជុំវិញបញ្ហានេះ អតីតមន្ត្រីជាន់ខ្ពស់បក្សប្រឆាំង លោក មុត ចន្ថា បានសរសេរលើគណនីហ្វេសប៊ុករបស់លោកកាលពីថ្ងៃទី២២ ឧសភា នេះថា នៅពេលដែលរដ្ឋាភិបាលធ្វើតាមការទាមទាររបស់សហរដ្ឋអាមេរិក កម្ពុជានឹងទទួលបានបានប្រយោជន៍ជាច្រើនពីសហរដ្ឋអាមេរិក។ លោកបន្តថា នៅពេលណាលោក កឹម សុខា ទទួលបានសិទ្ធិសេរីភាពពេញលេញឡើងវិញ នោះការផ្សះផ្សាជាតិ និងការឯកភាពជាតិប្រាកដជានឹងកើតមានជាមិនខាន ហើយអ្នកដែលចំណេញគឺពលរដ្ឋខ្មែរគ្រប់រូប។
រយៈពេលចុងក្រោយនេះ ជំហរផ្លូវការរបស់ប្រទេសលោកសេរី ទាំងសហរដ្ឋអាមេរិក និងសហភាពអឺរ៉ុប នៅតែទទូចទាមទារឱ្យមេដឹកនាំបក្សប្រឆាំង លោក កឹម សុខា ទទួលបាននូវសិទ្ធិសេរីភាពនយោបាយ ដើម្បីដឹកនាំគណបក្សប្រឆាំងគួរឱ្យទុកចិត្តមួយនៅក្នុងការបោះឆ្នោតនាពេលខាងមុខនេះ។
ក្រុមអ្នកសង្កេតការណ៍ខ្លះនិយាយថា ប្រសិនបើរដ្ឋាភិបាលកម្ពុជាអនុវត្តបានតាមការទាមទាររបស់សហរដ្ឋអាមេរិក និងសហភាពអឺរ៉ុប នោះកម្ពុជានឹងទទួលបាននូវផលប្រយោជន៍ទាំងប្រព័ន្ធអនុគ្រោះពន្ធ EBA របស់សហភាពអឺរ៉ុប និងប្រព័ន្ធអនុគ្រោះពន្ធ GSP របស់សហរដ្ឋអាមេរិក ដែលកម្ពុជាកំពុងតែចង់បាននៅពេលនេះជាមិនខាន៕