ក្រោយពីយកបានតំបន់គ្រីមៀរ នៅឆ្នាំ២០១៤ ដោយមិនគ្រប់គ្រាន់ ប្រធានាធិបតីរុស្ស៊ី លោក វ៉្លាឌីមៀរ ពូទីន (Vladimir Putin) សម្រេចប្រើមហិច្ឆតាថ្មីមួយទៀត គឺលើកទ័ពឈ្លានពានដើម្បីវាយកាន់កាប់ដែនដីមួយផ្នែកទៀតពីអ៊ុយក្រែន ហើយបើវាយលុកលុយបាន គឺទម្លាក់រដ្ឋាភិបាលប្រជាធិបតេយ្យរបស់ប្រទេសនេះតែម្ដង។
ប្រធានាធិបតីថ្មីរបស់អ៊ុយក្រែនបច្ចុប្បន្ននេះ គឺជាតារាកំប្លែង តែជាតារាស្នេហាជាតិដោយមិនយល់ព្រមកាត់ទឹកដីដើម្បីជាថ្នូរនឹងសន្តិភាពឡើយ។ របបក្រុងមូស្គូ លើកទ័ព ២០ម៉ឺននាក់ឡោមព័ទ្ធអ៊ុយក្រែន គំរាមឱ្យលោកប្រធានាធិបតី វូឡូឌីមៀរ ហ្សេឡិនស្គី (Volodymyr Zelenskyy) យល់ព្រមទម្លាក់ចោលការចង់ក្លាយជាសមាជិកយោធាណាតូ (NATO) ជាមួយនឹងការបង្ខំឱ្យប្រកាន់យកគោលនយោបាយសន្តិសុខអព្យាក្រឹត គឺមានន័យថា មិនត្រូវចូលបក្សសម្ព័ន្ធយោធាណាមួយដាច់ខាត រួមទាំងអង្គការណាតូ។
ដោយឡោមព័ទ្ធអ៊ុយក្រែនហើយ គឺអ៊ុយក្រែននៅតែមិនប្រកាសថាខ្លួនប្រកាន់យកគោលនយោបាយយោធាអព្យាក្រឹត គឺលោក ពូទីន បានសម្រេចលើកទ័ពឈ្លានពានអ៊ុយក្រែនតែម្ដង ដោយក្រោមលេសថាទៅរំដោះប្រជាជនរុស្ស៊ីនៅតំបន់ដុនបាស់ ពីការបាញ់សម្លាប់ពីសំណាក់កងទ័ពអ៊ុយក្រែន ដែលលោក ពូទីន ចោទថាកងទ័ពអ៊ុយក្រែនបានសម្លាប់ជនជាតិរុស្ស៊ីរាប់ពាន់នាក់។
តែការពិត គឺធាតុផ្សំ ៣យ៉ាងតិចនៅក្រោមផែនការរបស់លោក ពូទីន សម្រេចបើកទ្វារសង្គ្រាមវាយអ៊ុយក្រែន។ ធាតុផ្សំទាំង៣ នេះ រួមមានការលើកទ័ពលុកលុយអ៊ុយក្រែន ដើម្បីផ្ដួលរំលំការដឹកនាំរបស់លោកប្រធានាធិបតី ហ្សេឡិនស្គី ដែលលោក ពូទីន ចោទថាជាអាយ៉ងរបស់ពួកបស្ចិមប្រទេស។ បើផែនការនេះបានសម្រេច គឺលោក ពូទីន លើកបន្តុបមេដឹកនាំថ្មីប្រទេសអ៊ុយក្រែន ដែលរណបក្រុងមូស្គូ។ ផែនការមួយទៀត គឺលោក ពូទីន សម្រេចបាននូវការរុញឱ្យអ៊ុយក្រែនជាប្រទេសផ្ដាច់ខ្លួនពីសម្ពន្ធមិត្តរបស់ពួកបស្ចិមប្រទេស។ ចំពោះផែនការទី៣ គឺលោក ពូទីន ងាយយកបាននូវតំបន់ភាគខាងកើតប្រទេស គឺតំបន់ដុនបាស់ គឺឱ្យដូចនឹងការយកបានតំបន់គ្រីមៀរ កាលពីឆ្នាំ២០១៤ តាមរយៈការបោះឆ្នោតផ្ដាច់ខ្លួន។
នេះជាធាតុផ្សំដែលលោក ពូទីន អនុវត្តទៅលើប្រទេសអ៊ុយក្រែន។ ដោយលើកទ័ពឡោមព័ទ្ធដល់ទៅ ២០ម៉ឺននាក់ជាមួយនឹងសព្វាវុធធុនធ្ងន់មានទាំងកាំជ្រួច កាំភ្លើងធំ រថក្រោះ រថពាសដែករាប់រយគ្រឿង នៅតែអ៊ុយក្រែនមិនបានលុតជង្គង់សុំចុះចាញ់។ ទីបំផុត លោក ពូទីន ក៏សម្រេចលើកទ័ពវាយអ៊ុយក្រែន ដើម្បីសម្រេចបំណងរបស់ខ្លួនទាំង៣ នេះ ដោយបង្កឱ្យមានភ្លក់ភ្លើងសង្គ្រាមយ៉ាងសន្ធោសន្ធៅមកដល់ពេលនេះ។
នេះជាមេរៀនមួយដែលធ្វើឱ្យប្រទេសជិតខាងនឹងរុស្ស៊ី បារម្ភគិតថា ថ្ងៃនេះរុស្ស៊ីឈ្លានពានអ៊ុយក្រែន ហើយបើរុស្ស៊ីសម្រេចបាននូវអនុត្តរភាពដូចនេះ គឺរុស្ស៊ីដែលនៅក្រោមការដឹកនាំរបស់បុរសខ្លាំង ពូទីន អាចនឹងឈ្លានពានប្រទេសទន់ខ្សោយណាមួយទៀត។
ដោយបារម្ភអំពីមហិច្ឆតារបស់លោក ពូទីន ដូចនេះ បាននាំឱ្យប្រទេសពីរដែលមានព្រំដែនជាប់នឹងរុស្ស៊ី គឺប្រទេសហ្វាំងឡង់ និងស៊ុយអែត សម្រេចសុំចូលជាសមាជិកណាតូ ដោយមិនខ្វល់នឹងការព្រមានរបស់រុស្ស៊ីឡើយ។ ទាំងលោក ពូទីន និងរដ្ឋមន្ត្រីការបរទេស ហ្សេហ្គេ ឡារុស បានព្រមានថា នឹងដាក់ពង្រាយក្បាលគ្រាប់នុយក្លេអ៊ែរនៅតាមព្រំដែនរុស្សីជាប់នឹងប្រទេសពីរនេះ បើប្រទេសពីរនេះក្លាយជាសមាជិកណាតូជាផ្លូវការ។
តែមើលទៅមិនអាចទប់ស្កាត់ប្រទេសអព្យាក្រឹតនេះបានឡើយ។ បន្ទាប់ពីស្ថិតនៅអព្យាក្រឹតមិនចូលបក្សសម្ព័ន្ធយោធាអស់រយៈពេលជិតពីរសតវត្សរ៍ ស៊ុយអែត និងហ្វាំងឡង់ សម្រេចបើកទំព័រថ្មី គឺបោះបង់ចោលភាពអព្យាក្រឹតតាមរយៈការស្នើសុំចូលជាសមាជិកអង្គការយោធាណាតូ។
នាយករដ្ឋមន្ត្រីស៊ុយអែត អ្នកស្រី Magdalena Andersson បានថ្លែងនៅចំពោះមុខអ្នកសារព័ត៌មានកាលពីថ្ងៃចន្ទ ទី១៦ ឧសភា ថា រដ្ឋាភិបាលរបស់អ្នកស្រីសម្រេចចិត្តចូលសមាជិកណាតូហើយដោយមិនបង្អង់ទៀតឡើយ។
ចំណែកអ្នកស្រី Sanna Mirella Marin នាយករដ្ឋមន្ត្រីហ្វាំងឡង់ ក៏បានបញ្ជាក់ថា ហ្វាំងឡង់ទ្រាំលែងបានហើយចំពោះការគំរាមកំហែង និងរំលោភបំពានពីសំណាក់រុស្ស៊ីដែលតែងតែបញ្ចេញយន្តហោះចម្បាំងឱ្យហោះចូលដែនអាកាសរបស់ហ្វាំងឡង់។ អ្នកស្រីថាទង្វើដែលរុស្ស៊ីឈ្លានពានអ៊ុយក្រែន គឺជាមេរៀនមួយដែលហ្វាំងឡង់ គិតថា ហ្វាំងឡង់អាចជួបរឿងនេះដូចអ៊ុយក្រែននៅពេលណាមួយ។
សម្រាប់អ្នកស្រី Andersson សង្ឃឹមថា សមាជិកណាតូទាំង ៣០ប្រទេស នឹងអនុម័តទទួលយកបេក្ខភាពស៊ុយអែត ឱ្យក្លាយជាសមាជិករបស់អង្គការយោធាតំបន់នេះក្នុងក្របខ័ណ្ឌនៃសហគមន៍តែមួយ។
ទាំងស៊ុយអែត និងហ្វាំងឡង់ បានដាក់ពាក្យជាសមាជិកអង្គការណាតូនៅពេលដំណែលគ្នានេះ។ សម្រាប់ហ្វាំងឡង់ បានដាក់បេក្ខភាពជាផ្លូវការកាលពីថ្ងៃចន្ទ ទី១៦ ឧសភា នេះ។
ជាមួយគ្នានេះ អគ្គលេខាធិការណាតូ លោក Jens Stoltenberg បានថ្លែងថា លោកសង្ឃឹមថាណាតូនឹងបន្ថែមសមាជិកពីរប្រទេសនេះទៀតនៅពេលដ៏ឆាប់នេះ ដែលលោកថាសមាជិកថ្មីនេះនឹងស្ថិតក្នុងក្របខ័ណ្ឌណាតូ គឺណាតូមានកាតព្វកិច្ចជួយការពារសន្តិសុខ និងដែនអធិបតេយ្យនៃប្រទេសពីរនេះ ដោយការពារគ្រប់ស្ថានការណ៍ទាំងអស់ បើប្រទេសពីរនេះរងការឈ្លានពានពីសំណាក់ប្រទេសរុស្ស៊ី។
បើដូចនេះ មានន័យថា រុស្ស៊ី និងលោក ពូទីន កំពុងតែប្រឈមយ៉ាងពិតប្រាកដនូវកម្លាំងយោធាដ៏ធំរបស់ក្រុមបស្ចិមប្រទេសដែលដឹកនាំដោយសហរដ្ឋអាមេរិក អង់គ្លេស បារាំង អាល្លឺម៉ង់ កាណាដា ហុឡង់ដ៍ អ៊ីតាលី និងប្រទេសជាសមាជិកណាតូផ្សេងៗទៀត ព្រោះកងទ័ព និងសព្វាវុធរបស់ណាតូនឹងត្រូវដាក់ពង្រាយជាប់នឹងព្រំដែនរុស្ស៊ីផ្ទាល់តែម្ដង។
បើស៊ុយអែត និងហ្វាំងឡង់ ជាសមាជិកណាតូទី៣១ និង៣២ មានន័យថា សមាជិកណាតូនៅអឺរ៉ុបខាងកើត និងខាងជើងទាំងអស់សុទ្ធតែមានព្រំដែនជាប់នឹងព្រំដែនប្រទេសរុស្ស៊ី៕