ការចរចារវាងរុស្ស៊ី និងអង្គការសម្ពន្ធភាពយោធាណាតូ (NATO) មិនអាចបំបែកភាពទាល់ច្រកអំពីស្ថានការណ៍យោធារវាងរុស្ស៊ី និងអ៊ុយក្រែន ប្រទេសអង់គ្លេសដែលជាសមាជិកមួយដ៏មានឥទ្ធិពលនៃអង្គការយោធាណាតូ បានសម្រេចបញ្ជូនសព្វាវុធ និងកងទ័ពមួយក្រុមតូចទៅកាន់ប្រទេសអ៊ុយក្រែន នៅថ្ងៃអង្គារ ទី១៨ មករា នេះ។
តាមសេចក្ដីរាយការណ៍ពីបណ្ដាញផ្សាយព័ត៌មាន BBC សព្វាវុធប្រទេសអង់គ្លេស នឹងទៅដល់ប្រទេសអ៊ុយក្រែន នៅថ្ងៃទី១៨ មករា នេះ។ លោក Ben Wallace រដ្ឋមន្ត្រីក្រសួងការពារជាតិអង់គ្លេស បានប្រាប់ BBC ថា កងទ័ពមួយក្រុមតូចដែលអមដំណើរសព្វាវុធទៅកាន់ប្រទេសអ៊ុយក្រែន គឺដើម្បីទៅហ្វឹកហ្វឺនកងទ័ពអ៊ុយក្រែន ក្នុងការប្រើប្រាស់សព្វាវុធទាំងនោះ។ លោក Wallace បញ្ជាក់ថា កងទ័ពអង់គ្លេសមួយក្រុមនេះនឹងមិនក្លាយជាកម្លាំងគំរាមរុស្ស៊ី នោះទេ។
តាមរដ្ឋមន្ត្រីការពារជាតិអង់គ្លេស Ben Wallace សព្វាវុធរបស់អង់គ្លេសដែលបញ្ជូនទៅប្រទេសអ៊ុយក្រែន ក្នុងនោះមានអាវុធកម្ទេចរថក្រោះផងដែរ ហើយអាវុធទាំងនោះនឹងទៅដល់ប្រទេសអ៊ុយក្រែន នៅថ្ងៃទី១៨ មករា នេះ។
ការបញ្ជូនសព្វាវុធពីប្រទេសអង់គ្លេស ទៅអ៊ុយក្រែន ធ្វើឡើងបន្ទាប់ពីរដ្ឋការសហរដ្ឋអាមេរិកនៃប្រធានាធិបតី ចូ បៃដិន ព្រមានថា រុស្ស៊ីអាចឈ្លានពានអ៊ុយក្រែនដោយមិនកំណត់ពេលជាក់លាក់។
ទីប្រឹក្សាសន្តិសុខជាតិអាមេរិក លោក Jake Sullivan បានឱ្យដឹងថា ក្រុងមូស្គូ អាចនឹងច្នៃប្រឌិតហេតុការណ៍ ហើយយកលេសធ្វើការឈ្លានពានអ៊ុយក្រែន ដែលចាំបាច់ត្រូវការការពារអ៊ុយក្រែន។ លោកឱ្យដឹងថា រដ្ឋាភិបាលអង់គ្លេសដែលបញ្ជូនសព្វាវុធទៅអ៊ុយក្រែន គឺចំពេលស្ថានការណ៍មួយត្រូវប្រកាន់ជំហរបែបនេះ។
ចំពោះរដ្ឋមន្ត្រីការពារជាតិអង់គ្លេស Ben Wallace លោកបាននិយាយថា លោកបានស្នើអញ្ជើញសមភាគីរុស្ស៊ី លោក Sergey Shoigu មកជួបលោកនៅក្នុងទីក្រុងឡុងដ៍ នៅពេលខាងមុខនេះ ដើម្បីជជែកគ្នាដោយផ្ទាល់ជាមួយនឹងលោកអំពីប្រទេសអ៊ុយក្រែន។
កាលពីថ្ងៃទី១៤ មករា ប្រទេសស៊ុយអែត បានសម្រេចពង្រាយកម្លាំងទ័ពនៅលើកោះ Gotland របស់ខ្លួនដែលស្ថិតនៅកណ្តាលសមុទ្របាល់ទិក។ កោះនេះគឺជាដែនដីស៊ុយអែត និងជាតំបន់ជួរមុខការពារសន្តិសុខតំបន់អឺរ៉ុបខាងជើងទប់ទល់នឹងរុស្ស៊ី។
ប៉ុន្មានថ្ងៃចុងក្រោយនេះ រុស្ស៊ីបញ្ចេញនាវាដែលអាចផ្ទុកកម្លាំងទ័ពចំនួន ៦គ្រឿង ចល័តនៅក្នុងសមុទ្របាល់ទិក។ ដោយសង្កេតឃើញស្ថានការណ៍នេះ រដ្ឋាភិបាលស៊ុយអែត បានសម្រេចបញ្ជូនកម្លាំងទ័ព និងគ្រឿងសព្វាវុធដាក់ត្រៀមនៅលើកោះនោះ។ សកម្មភាពនៃការពង្រាយកម្លាំងដាក់នៅលើកោះ Gotland ត្រូវបានកងទ័ពស៊ុយអែត បញ្ជូនចេញពីក្រុងស្តុកខុម តាមយន្តហោះចម្បាំង និងតាមនាវាផងដែរ។
ស្ថានការណ៍យោធានៅពេលនេះ គឺមានការប្រឈមមុខដាក់គ្នាជាខ្លាំងរវាងរុស្ស៊ី និងក្រុមប្រទេសអឺរ៉ុបខាងជើង និងខាងកើត។ មិនថាឡើយប្រទេសអ៊ុយក្រែន នោះដែលរុស្ស៊ី បានបង្ហាញជំហរប្រឆាំងចំពោះគម្រោងចូលជាសមាជិកយោធាណាតូ គឺរុស្ស៊ី ក៏មិនចង់ឃើញស៊ុយអែត និងហ្វាំងឡង់ ជាសមាជិករបស់ណាតូ ផងដែរ។ ជាមួយនឹងការបញ្ជូនកម្លាំងទ័ពទៅពង្រាយនេះ ក្រសួងការពារជាតិស៊ុយអែត ចង់បង្ហាញសញ្ញាថា ស៊ុយអែត មិនចង់ទទួលយកការប្រឈមនឹងសកម្មភាពគំរាមឈ្លានពានពីសំណាក់រុស្ស៊ី នោះទេ។
ចំពោះប្រទេសប៉ូឡូញ ដែលជាប់នឹងរុស្ស៊ីខ្លាំងជាងគេវិញ គឺរដ្ឋមន្ត្រីម្នាក់របស់ប្រទេសអឺរ៉ុបខាងកើតមួយនេះ បានដាក់ការព្រួយបារម្ភអំពីការផ្ទុះសង្គ្រាមនៅអឺរ៉ុបខាងកើត។
រដ្ឋមន្ត្រីការបរទេសនៃប្រទេសប៉ូឡូញ លោក Zbigniew Rau បាននិយាយកាលពីថ្ងៃព្រហស្បតិ៍ ទី១៣ មករា ថា អឺរ៉ុបខាងកើតកំពុងតែធ្លាក់នៅក្នុងហានិភ័យយ៉ាងច្បាស់ថាជៀសពុំរួចនៃការផ្ទុះសង្គ្រាម ខណៈរុស្ស៊ីនិយាយថា ការចរចារវាងសហរដ្ឋអាមេរិក និងរុស្ស៊ី និងរវាងអង្គការយោធាណាតូ និងរុស្ស៊ី បានដល់ចំណុចជាប់គាំងស្ដូក ហើយទីក្រុងមូស្គូព្រមានថាគ្មានការចរចាបន្តទៀតនោះទេ។
លោក Zbigniew Rau បានថ្លែងទៅកាន់វេទិកាសន្តិសុខ ៥៧ប្រទេសថា ដំណាក់កាលនេះមើលទៅហានិភ័យនៃសង្គ្រាមនៅក្នុងតំបន់អឺរ៉ុប គឺវាធ្ងន់ជាង ៣០ឆ្នាំមុនទៅទៀត។ ខណៈនេះ គេមិនបើកភ្នែករំលងសង្គ្រាមនោះទេ គឺប្រយ័ត្នដូចកាលពីប្រទេសយូហ្គោស្លាវី ដែលជាអតីតសហភាពសូវៀត ទីបំផុតធ្លាក់ក្នុងសង្គ្រាម ហើយក្រោយមកក៏អង្គការណាតូ លើកទ័ពលុកលុយប្រទេសនេះតែម្ដង។
ប្រមុខការទូតប៉ូឡូញរូបនេះបានរាយការណ៍ថា ការចរចាថ្មីៗនេះរវាងអង្គការណាតូ និងរុស្ស៊ី ក៏ដូចជារវាងអាមេរិក និងរុស្ស៊ី ពុំបានបំបែកភាពទាល់ច្រកនោះទេ។
ស្ថានការណ៍ដ៏អាក្រក់នេះនៅអឺរ៉ុបខាងកើត បានកើតមានរយៈពេលជាងមួយខែមកហើយបន្ទាប់ពីរុស្ស៊ី បង្កើនវត្តមានកងទ័ពរបស់ខ្លួនជាមួយនឹងការដាក់ពង្រាយសព្វាវុធទំនើបៗនៅជាប់ព្រំដែនអ៊ុយក្រែន ដែលចំនួនកងទ័ពរបស់រុស្ស៊ី មកដល់ពេលនេះ នៅតែមានជាង ១០ម៉ឺននាក់នៅឡើយ។ ចំណែកឯអ៊ុយក្រែនឯណោះវិញ ក៏បង្កើនវត្តមានកងទ័ព និងសព្វាវុធជាប់នឹងព្រំដែនរុស្ស៊ីផងដែរ។ បើតាមព័ត៌មាន គឺចំនួនកងទ័ពអ៊ុយក្រែនជាប់នឹងព្រំដែនរុស្ស៊ី កើនឡើងជាង ១៥ម៉ឺននាក់៕