បុគ្គលិកនិងសមាជិកសហជីពនៃក្រុមហ៊ុន ណាហ្គាវើលដ៍ (NAGA World) បាននាំគ្នាដាក់ញត្តិនៅស្ថានទូតប្រទេសមហាអំណាចធំៗប្រចាំកម្ពុជា ដើម្បីសុំឱ្យស្ថានទូតទាំងនោះជួយជំរុញ និងអន្តរាគមន៍ទៅរដ្ឋាភិបាល និងស្ថាប័នពាក់ព័ន្ធ ដោះលែងតំណាង ៨នាក់ជាបន្ទាន់ និងឥតលក្ខខណ្ឌ រួមទាំងដោះស្រាយវិវាទការងាររបស់ពួកគេ។
តំណាងបុគ្គលិក និយោជិត និងសមាជិកសហជីពនៃក្រុមហ៊ុន ណាហ្គាវើលដ៍ ប្រមាណ ២៥នាក់ នៅថ្ងៃទី១៧ ខែមករា ឆ្នាំ២០២២ បាននាំគ្នាយកញត្តិដែលមានស្នាមមេដៃបុគ្គលិកកំពុងធ្វើកូដកម្មសរុបជាង ១ពាន់នាក់ ដាក់ទៅស្ថានទូតមួយចំនួនប្រចាំប្រទេសកម្ពុជា។ ស្ថានទូតទាំងនោះមានសហរដ្ឋអាមេរិក ចក្រភពអង់គ្លេស អាល្លឺម៉ង់ សិង្ហបុរី សហភាពអឺរ៉ុប និងកាណាដា ដោយការដាក់ញត្តិនេះក្រោមការតាមដាន និងឃ្លាំមើលពីក្រុមអាជ្ញាធរផងដែរ។
បុគ្គលិកណាហ្គាវើលដ៍ កញ្ញា ឧកសុភ័ក្រ មូលីកា បានប្រាប់អ្នកសារព័ត៌មានថា មូលហេតុដែលពួកគេដាក់ញត្តិនៅស្ថានទូតខាងលើនេះ ដោយសារប្រទេសទាំងនោះមានការគោរពសិទ្ធិមនុស្ស និងគោរពសិទ្ធិការងារ ដែលអាចជំរុញទៅរដ្ឋាភិបាលកម្ពុជាឱ្យអន្តរាគមន៍បន្តទៅថៅកែក្រុមហ៊ុនកាស៊ីណូណាហ្គាវើលដ៍ ដោះស្រាយវិវាទការងារ និងសំណើរបស់ពួកគាត់។
កញ្ញានៅតែចាត់ទុកការឃុំខ្លួន និងចោទប្រកាន់លើតំណាងសហជីពទាំង ៨នាក់ពីសំណាក់តុលាការកម្ពុជានោះ ថាជារឿងអយុត្តិធម៌។ ករណីនេះ កញ្ញាស្នើទៅស្ថានទូតប្រទេសលោកសេរីជួយអន្តរាគមន៍ដោះស្រាយវិវាទការងារ និងជួយឱ្យមានការដោះលែងតំណាងរបស់ពួកគេចំនួន ៨នាក់មកវិញ។
កញ្ញា ឧកសុភ័ក្រ មូលីកា បញ្ជាក់ថា មន្ត្រីស្ថានទូតបានទទួលយកញត្តិពីពួកគាត់ លើកលែងតែស្ថានទូតអាមេរិក មិនបានចេញទទួលញត្តិរបស់តំណាងសហជីពនោះទេ ដោយសារតែថ្ងៃចន្ទនេះជាថ្ងៃសម្រាកបុណ្យជាតិ ប៉ុន្តែសន្តិសុខបានប្រាប់ឱ្យតំណាងសហជីពយកញត្តិរបស់ពួកគេមកដាក់នៅថ្ងៃបន្ទាប់ ខណៈមន្ត្រីសហភាពអឺរ៉ុបក៏បានសន្យានឹងយកបញ្ហារបស់ពួកគាត់ប្រាប់ទៅរដ្ឋាភិបាលកម្ពុជាថែមទៀត។
ក្រោយពីដាក់ញត្តិ ពួកគេបាននាំគ្នាបន្តធ្វើកូដកម្មដោយសន្តិវិធីទៀតទាំងកណ្ដាលថ្ងៃនៅជិតក្រុមហ៊ុន ទោះបីមានការដាក់របាំងរារាំង និងការតាមឃ្លាំមើលពីសំណាក់អាជ្ញាធរគ្រប់ផ្នែក។ អំឡុងពេលធ្វើកូដកម្មនោះ ពួកគេលើកឡើងថា ពីជនរងគ្រោះក្លាយជាអ្នកទោសដោយការប្រើប្រាស់សិទ្ធិការងារ។ ពួកគេបន្តថា ពួកគេមានវិវាទការងារជាមួយថៅកែក្រុមហ៊ុនណាហ្គាវើលដ៍ មិនមែនជាមួយរដ្ឋាភិបាល ឬតុលាការ ឬអាជ្ញាធរឡើយ។ ករណីនេះ ពួកគេស្នើសុំកុំបង្កើត ឬលាបពណ៌បញ្ហានេះទៅជារឿងអ្វីផ្សេងៗនោះ។
ការមិនដោះស្រាយវិវាទការងាររយៈពេល ៩ខែមកនេះ បង្ហាញអំពីភាពអសកម្មរបស់រដ្ឋាភិបាលកម្ពុជា និងភាគីពាក់ព័ន្ធក្នុងការស្វែងរកដំណោះស្រាយជូនបាតុករ ហើយថែមទាំងតុលាការក្រុងភ្នំពេញបានឃុំខ្លួនប្រធានសហជីពទ្រទ្រង់សិទ្ធិការងារបុគ្គលិកកម្មករខ្មែរនៃក្រុមហ៊ុន ណាហ្គាវើលដ៍ កញ្ញា ឈឹម ស៊ីថរ និងសមាជិកសហជីព ៧នាក់នៅពន្ធនាគារព្រៃស ក្រោមបទចោទ «ញុះញង់បង្កឱ្យមានភាពវឹកវរធ្ងន់ធ្ងរដល់សន្តិសុខសង្គម»។
គិតត្រឹមថ្ងៃទី១៧ ខែមករា ឆ្នាំ២០២២ អ្នកទាំង ៨នាក់បានជាប់ឃុំក្នុងពន្ធនាគារព្រៃសអស់រយៈពេល ១៨ថ្ងៃហើយ។
ជាមួយគ្នានេះ ក្រុមអង្គការសង្គមស៊ីវិលក៏បានធ្វើយុទ្ធនាការតាមបណ្ដាញសង្គម (Facebook) ជាបន្តបន្ទាប់ ទាមទារឱ្យអាជ្ញាធរត្រូវតែដោះលែងថ្នាក់ដឹកនាំ និងសមាជិកសហជីព ៨នាក់ជាបន្ទាន់ និងដោយគ្មានលក្ខខណ្ឌ។ សង្គមស៊ីវិលស្នើឱ្យសាលាដំបូងរាជធានីភ្នំពេញលុបចោលដីកាសម្រេចចាត់ចែងជាបណ្ដោះអាសន្ន ចុះថ្ងៃទី១៦ ខែធ្នូ ឆ្នាំ២០២១ ដែលចាត់ទុកថា កូដកម្មរបស់បុគ្គលិកក្រុមហ៊ុន ណាហ្គាវើលដ៍ ជាកូដកម្មខុសច្បាប់នោះចេញវិញ។
កាលពីថ្ងៃទី១០ ខែមករា ឆ្នាំ២០២២ អ្នកជំនាញសិទ្ធិមនុស្សរបស់អង្គការសហប្រជាជាតិ (UN) បានលើកទឹកចិត្តដល់សកម្មជនសង្គមដែលត្រូវបានដាក់ឱ្យស្ថិតក្រោមការតាមដានតាមផ្លូវតុលាការ ឱ្យបន្តប្រើប្រាស់សិទ្ធិធ្វើកិច្ចការសង្គមដូចមានចែងនៅក្នុងច្បាប់ ដោយសំអាងថា សកម្មភាពសិទ្ធិមនុស្សមិនមែនជាបទល្មើសព្រហ្មទណ្ឌឡើយ។
លើសនេះ កាលពីថ្ងៃទី២ ខែវិច្ឆិកា ឆ្នាំ២០២១ អ្នកជំនាញផ្នែកសិទ្ធិមនុស្សនៃអង្គការសហប្រជាជាតិ (UN) ក៏បានអំពាវនាវចំៗឱ្យរដ្ឋាភិបាលកម្ពុជា បញ្ឈប់ជាបន្ទាន់នូវការប្រើប្រាស់ប្រព័ន្ធតុលាការកាត់ទោសលើអ្នកហ៊ានក្រោកឈរដើម្បីសិទ្ធិមនុស្ស និងសេរីភាពបញ្ចេញមតិនៅកម្ពុជា៕