ក្រសួងទេសចរណ៍ អះអាងថា កម្ពុជាទទួលបានភ្ញៀវទេសចរទូទាំងប្រទេសសរុបជាង ១លាន ១សែននាក់ក្នុងឱកាសឆ្លងឆ្នាំ២០២១ ចូលឆ្នាំ២០២២ ហើយតួលេខនេះបង្ហាញថា ភ្ញៀវទេសចរឆ្នាំ២០២២ នេះមានការកើនឡើងដល់ទៅ ៦៣,៦៥% បើធៀបនឹងឱកាសឆ្លងឆ្នាំសកលឆ្នាំ២០២០ ចូលឆ្នាំ២០២១ កន្លងទៅ។
រដ្ឋមន្ត្រីក្រសួងទេសចរណ៍ លោក ថោង ខុន បានអះអាងកាលពីថ្ងៃទី១ ខែមករា ឆ្នាំ២០២២ នេះថា ក្នុងចំណោមភ្ញៀវទេសចរជាង ១លាន ១សែននាក់នេះ ខេត្តជាគោលដៅទេសចរណ៍ធំៗមានតែ ៧រាជធានី-ខេត្តប៉ុណ្ណោះដែលមានភ្ញៀវទេសចរច្រើនលើសលប់ចាប់ពីជាង ៥ម៉ឺននាក់ រហូតដល់ជាង ៣សែននាក់ ក្នុងនោះរាជធានីភ្នំពេញ និងខេត្តសៀមរាប មានភ្ញៀវទេសចរច្រើនជាងខេត្តផ្សេងទៀតលើសលប់។
លោក ថោង ខុន អះអាងថា គោលដៅទេសចរណ៍នានានៅទូទាំងប្រទេសសុទ្ធតែទទួលបានចំនួនភ្ញៀវទេសចរយ៉ាងផុសផុល ព្រោះថាបន្ទប់សណ្ឋាគារ ផ្ទះសំណាក់ រីស៊ត និងបឹងហ្កាឡូ ត្រូវបានភ្ញៀវកក់ស្ទើរពេញមួយរយភាគរយ ខណៈដែលមូលដ្ឋានអាជីវកម្មទេសចរណ៍ផ្សេងៗក៏បានបើកដំណើរការទទួលភ្ញៀវទេសចរឡើងវិញកាន់តែច្រើនឡើងផងដែរ។
ការអះអាងនេះ ធ្វើឡើងបន្ទាប់ពីភ្ញៀវទេសចរផ្ទៃក្នុងបានកម្រើកឡើងវិញនៅថ្ងៃឆ្លងឆ្នាំសកលទូទាំង ២៥រាជធានី-ខេត្ត កាលពីចុងខែធ្នូ ឆ្នាំ២០២១ ចូលខែមករា ឆ្នាំ២០២២ កន្លងទៅនេះ។
កាលពីចុងឆ្នាំ២០២០ នាយិកាធនាគារអភិវឌ្ឍន៍អាស៊ីប្រចាំកម្ពុជា អ្នកស្រី Sunniya Durrani-Jamal បានអះអាងថា ជំងឺ Covid-19 បានជះឥទ្ធិពលអាក្រក់យ៉ាងខ្លាំងលើវិស័យទេសចរណ៍នៅកម្ពុជា ដែលបណ្តាលឲ្យវិស័យមួយនេះបានធ្លាក់ចុះដល់ទៅជាង ៩៨% ដែលបណ្តាលឱ្យអាជីវកម្មជាង ៣ពាន់កន្លែងត្រូវដួលរលំ ហើយកម្មករដែលបម្រើក្នុងវិស័យនេះជាង ៤ម៉ឺននាក់ ត្រូវបាត់បង់ការងារទាំងស្រុង។
ក្រសួងទេសចរណ៍ ធ្លាប់បានបញ្ចេញរបាយការណ៍របស់ខ្លួនថា ក្នុងឆ្នាំ២០២០ កម្ពុជាទទួលបានភ្ញៀវទេសចរអន្តរជាតិប្រមាណត្រឹមតែជាង ១លាន ៣សែននាក់ប៉ុណ្ណោះ គឺបានថយចុះប្រមាណ ៨០% និងទទួលបានភ្ញៀវទេសចរក្នុងស្រុកប្រមាណ ៩លាននាក់ គឺបានថយចុះ ២០% បើប្រៀបធៀបនឹងឆ្នាំ២០១៩ កន្លងទៅ។ ក្រសួងថាបញ្ហានេះបណ្តាលឲ្យឧស្សាហកម្មទេសចរណ៍នៅកម្ពុជាបាត់បង់ចំណូលជាង ៣ពាន់លានដុល្លារអាមេរិក៕