ក្រសួងសុខាភិបាល រំឭកដល់អភិបាលរាជធានី-ខេត្តទូទាំងប្រទេស ឲ្យពង្រឹងឲ្យមានប្រសិទ្ធភាពបន្ថែមទៀតចំពោះការងារប្រយុទ្ធប្រឆាំងនឹងជំងឺ Covid-19 ទោះបីលោក ហ៊ុន សែន បានបិទបញ្ចប់ព្រឹត្តិការណ៍ «២០ កុម្ភៈ» ដែលជាព្រឹត្តិការណ៍ចាប់ផ្ដើមឆ្លងជំងឺ Covid-19 នៅកម្ពុជាហើយក៏ដោយ។
សេចក្ដីជូនដំណឹងរបស់ក្រសួងសុខាភិបាល ដែលចេញផ្សាយជាសាធារណៈនៅថ្ងៃទី២២ ខែធ្នូ នេះឲ្យដឹងថា ដើម្បីឲ្យការប្រយុទ្ធនឹងជំងឺ Covid-19 នេះកាន់តែមានប្រសិទ្ធភាពថែមទៀត ក្រសួងសុខាភិបាលបានដាក់វិធានការ ៣ចំណុច និងក្រើនរំឭកដល់អភិបាលរាជធានី-ខេត្តទាំងអស់ ពង្រឹងបន្ថែមទៀតនូវការងារប្រយុទ្ធនឹងជំងឺ Covid-19។
វិធានការណែនាំរបស់ក្រសួងសុខាភិបាល គឺជំរុញការចាក់វ៉ាក់សាំងបង្ការជំងឺ Covid-19 ដូសមូលដ្ឋាន និងដូសជំរុញដល់ពលរដ្ឋក្នុងមូលដ្ឋានរបស់ខ្លួនឲ្យបានសម្រេចគោលដៅ។ បង្កើនការយកចិត្តទុកដាក់ថែទាំព្យាបាលអ្នកជំងឺ Covid-19 នៅតាមទីតាំងព្យាបាល និងមន្ទីរពេទ្យ ក៏ដូចជានៅតាមផ្ទះ ធ្វើយ៉ាងណាកាត់បន្ថយឲ្យបានជាអតិបរមានូវអត្រាឈឺធ្ងន់ និងស្លាប់ដោយសារជំងឺ Covid-19 ដោយអនុវត្តឲ្យបានល្អ និងគ្រប់ជ្រុងជ្រោយតាមមគ្គុទ្ទេសក៍សម្រាប់គ្រប់គ្រង និងព្យាបាលជំងឺ Covid-19 ដែលចេញដោយក្រសួងសុខាភិបាល។
ក្រសួងជំរុញឲ្យមានការអប់រំ ផ្សព្វផ្សាយ និងណែនាំដល់ពលរដ្ឋប្រតិបត្តិឲ្យបានត្រឹមត្រូវនូវវិធានការសុខាភិបាល ដោយរៀនរស់តាមគន្លងប្រក្រតីភាពថ្មីក្នុងបរិបទនៃជំងឺ Covid-19 និងអនុវត្តឲ្យបានខ្ជាប់ខ្លួន «៣ការពារ ៣កុំ» សំដៅកាត់បន្ថយអត្រាឆ្លងថ្មីឲ្យបានជាអតិបរិមា។
កាលពីថ្ងៃទី២១ ខែធ្នូ លោកនាយករដ្ឋមន្ត្រី ហ៊ុន សែន បានប្រកាសបិទបញ្ចប់ព្រឹត្តិការណ៍សហគមន៍ ២០ កុម្ភៈ ក្រោយពីប្រទេសកម្ពុជាហាក់បានធូរស្បើយពីការឆ្លងរាលដាលនៃជំងឺ Covid-19 អស់រយៈពេលប្រមាណ ២ឆ្នាំ។
ក្រសួងសុខាភិបាលក៏បានប្រកាសនៅថ្ងៃទី២២ ធ្នូ នេះដែរថា អត្រាឆ្លង និងស្លាប់ដោយសារមេរោគ Covid-19 បានថយចុះជាបន្តបន្ទាប់ ហើយសម្រាប់ថ្ងៃទី២១ ខែធ្នូ ក្រសួងប្រកាសថា តាមការពិនិត្យដោយម៉ាស៊ីនវិភាគ PCR គឺបានរកឃើញអ្នកឆ្លងមេរោគ Covid-19 ចំនួន ៣នាក់ ករណីជាសះស្បើយចំនួន ៩នាក់ និងករណីស្លាប់ ១នាក់។
ក្រសួងសុខាភិបាល បានប្រកាសដែរថា គិតត្រឹមថ្ងៃទី២១ ខែធ្នូ អ្នកឆ្លងជំងឺ Covid-19 នៅកម្ពុជាសរុបចំនួនជាង ១២ម៉ឺននាក់ (១២០៤៣០នាក់) ចំនួនអ្នកព្យាបាលបានជាសះស្បើយសរុបជាង ១១ម៉ឺន ៦ពាន់នាក់ (១១៦៨២៤នាក់) និងចំនួនអ្នកស្លាប់សរុបចំនួនជាង ៣ពាន់នាក់ (៣០០៦នាក់)។
ក្រសួងសុខាភិបាលបានបញ្ជាក់ដែរថា អត្រាចាក់វ៉ាក់សាំងបង្ការជំងឺ Covid-19 នៅកម្ពុជា គិតត្រឹមថ្ងៃទី២០ ខែធ្នូ ឆ្នាំ២០២១ បានចាក់លើពលរដ្ឋទូទៅបានចំនួន ៨៨,៩៤% បើធៀបជាមួយចំនួនប្រជាជនគោលដៅសរុប ១៦លាននាក់៕