លោក Antony Blinken រដ្ឋមន្ត្រីក្រសួងការបរទេសអាមេរិក ដែលកំពុងបំពេញទស្សនកិច្ចដំបូងនៅអាស៊ីអាគ្នេយ៍ ដោយចាប់ផ្តើមពីប្រទេសឥណ្ឌូនេស៊ី នៅថ្ងៃចន្ទ ទី១៣ ធ្នូ នេះ មានរបៀបវារៈសំខាន់ចំនួន៣ គឺឥទ្ធិពលចិន បញ្ហាសមុទ្រចិនខាងត្បូង និងវិបត្តិនៅប្រទេសភូមា។
តាមការចុះផ្សាយរបស់សារព័ត៌មានប្រទេសជប៉ុន Nikkei Asia ពីទីក្រុងហ្សាការតា ប្រមុខការទូតអាមេរិកបានទៅដល់ទីក្រុងហ្សាការតា រដ្ឋធានីនៃប្រទេសឥណ្ឌូនេស៊ី នៅរសៀលថ្ងៃចន្ទ។
គេរំពឹងថា លោក Antony Blinken នឹងថ្លែងសារស្ដីពីនយោបាយអាមេរិកចំពោះតំបន់ឥណ្ឌូ-ប៉ាស៊ីហ្វិក ដែលក្លាយជាចំណុចស្នូលនៃយុទ្ធសាស្ត្រធ្វើឱ្យតុល្យភាពនឹងចិន លើបញ្ហាសមុទ្រចិនខាងត្បូង។ ប៉ុន្តែបញ្ហាប្រទេសភូមា គឺមិនអាចភ្លេចបានឡើយសម្រាប់ប្រមុខការទូតអាមេរិករូបនេះ។
ប្រភពដដែលឲ្យដឹងថា លោក Antony Blinken ត្រូវជួបជាមួយប្រធានាធិបតីឥណ្ឌូនេស៊ី លោក ចូកូ វីដូដូ មុននឹងឡើងថ្លែងនៅលើវេទិកាមួយអំពីនយោបាយអាមេរិកចំពោះតំបន់ឥណ្ឌូ-ប៉ាស៊ីហ្វិកនៅថ្ងៃអង្គារ ទី១៤ ខែធ្នូ។
ក្នុងទស្សនកិច្ចលើកដំបូងនៅក្នុងសមាគមអាស៊ាន រដ្ឋមន្ត្រីក្រសួងការបរទេសអាមេរិករូបនេះ ចាប់យកប្រទេស៣ គឺឥណ្ឌូនេស៊ី ម៉ាឡេស៊ី និងប្រទេសថៃ។
ចេញពីឥណ្ឌូនេស៊ី ត្រូវបន្តដំណើរទៅម៉ាឡេស៊ី និងថៃ ដែលនៅទីនោះមានការរំពឹងថា លោក Antony Blinken នឹងលើកឡើងអំពីការពង្រឹងរចនាសម្ព័ន្ធសន្តិសុខតំបន់ប្រឈមនឹងការគំរាមកំហែងកាន់តែខ្លាំងឡើងៗពីសំណាក់ប្រទេសចិន នៅសមុទ្រចិនខាងត្បូង និងបញ្ហាប្រទេសភូមា។
ក្នុងពេលស្នាក់នៅក្នុងប្រទេសពីរនេះ លោក Blinken ត្រូវជួបជាមួយសមភាគី និងនាយករដ្ឋមន្ត្រីរបស់ប្រទេសពីរនេះ។ នៅឆ្នាំ២០២២ នេះ កងទ័ពជើងទឹកប្រទេសថៃ នឹងត្រូវធ្វើសមយុទ្ធជាមួយទ័ពជើងទឹកអាមេរិក នៅឈូងសមុទ្រថៃ។ គេរំពឹងថា លោក Blinken ក៏អាចលើកឡើងផងដែរជាមួយសមភាគីថៃ អំពីវិស័យសន្តិសុខជាតិរវាងអាមេរិក និងថៃ។
ការធ្វើសមយុទ្ធរវាងកងទ័ពជើងទឹកថៃ និងអាមេរិក ទោះជាការធ្វើឡើងដោយទ្វេភាគីក៏ដោយ តែជាយុទ្ធសាស្ត្ររបស់អាមេរិកទាញភូមិសាស្ត្រនយោបាយអាស៊ានឱ្យកាន់តែនៅជាមួយអាមេរិក ដែលកាលពីឆ្នាំ២០១៩ សមយុទ្ធរួមអាស៊ាន ១០ប្រទេស និងអាមេរិក បានធ្វើរួចទៅហើយ។ គេរំពឹងថា សមយុទ្ធដូចនេះនឹងអាចមាននៅឆ្នាំ២០២២ ខាងមុខនេះ។ ទាំងនេះសុទ្ធតែជាការពង្រឹងអំណាច និងឥទ្ធិពលរបស់មហាអំណាចមួយនេះនៅក្នុងតំបន់។
ប្រមុខការទូតអាមេរិក ធ្លាប់លើកឡើងថា ការពង្រីកឥទ្ធិពលនៅលើឆាកអន្តរជាតិរបស់ចិន គឺជាការបើកសមរភូមិភូមិសាស្ត្រនយោបាយនៅក្នុងតំបន់ ដែលអាមេរិកចាំបាច់ត្រូវបំពេញតួនាទីជាប្រទេសមហាអំណាច។
ក្រោយពីអាមេរិក និងសម្ពន្ធមិត្តដកទ័ពចេញពីអាហ្វហ្គានីស្ថាន លោកប្រធានាធិបតី ចូ បៃដិន បានសម្រេចដូរទិសដៅភូមិសាស្ត្រនយោបាយមកកាន់តំបន់ឥណ្ឌូ-ប៉ាស៊ីហ្វិក ហើយផ្តល់អាទិភាពនយោបាយការបរទេសដល់តំបន់អាស៊ីអាគ្នេយ៍។ តែបញ្ហាចិន ដំឡើងឥទ្ធិពលខ្លាំងនៅក្នុងតំបន់អាស៊ី គឺជាមូលហេតុដែលរដ្ឋការរបស់លោក ចូ បៃដិន ត្រូវពង្រឹងកម្លាំងសម្ពន្ធមិត្តរបស់អាមេរិកឡើងវិញ ជាពិសេសប្រទេសចំនួន៥ ដែលជាស្ថាបនិកអាស៊ាននៅឆ្នាំ១៩៦៧។ ចំពោះវិបត្តិនៅភូមា គឺពិតណាស់ដែលអាមេរិកត្រូវជួយស្ដារប្រជាធិបតេយ្យរបស់ប្រទេសសមាជិកសមាគមអាស៊ាននេះឡើងវិញ។
ទស្សនកិច្ចរបស់លោករដ្ឋមន្ត្រីក្រសួងការបរទេសអាមេរិករូបនេះ ក៏ជាការសម្របសម្រួលផងដែរនូវរបៀបវារៈរបស់អាស៊ាន ដែលត្រូវបើកកិច្ចជំនួបកំពូលអាមេរិក-អាស៊ាន នៅដើមឆ្នាំ២០២២ នៅទីក្រុងវ៉ាស៊ីនតោន ហើយនៅឆ្នាំ២០២២ គឺដល់វេនកម្ពុជាធ្វើជាប្រធានអាស៊ាន។ ដូចនេះហើយ បានជាទីប្រឹក្សាក្រសួងការបរទេសសហរដ្ឋអាមេរិក លោក Derek Chollet ត្រូវមកធ្វើទស្សនកិច្ចនៅកម្ពុជា។ លោក Derek Chollet បានជួបនឹងមន្ត្រីការទូតកម្ពុជា មានទាំងលោករដ្ឋមន្ត្រី ប្រាក់ សុខុន ផងដែរ។
សហរដ្ឋអាមេរិក រំពឹងថា នឹងបានធ្វើការជិតស្និទ្ធជាមួយកម្ពុជា ក្នុងនាមកម្ពុជា ជាប្រធានអាស៊ាននៅឆ្នាំ២០២២ ខាងមុខ។ នេះបើតាមការអះអាងរបស់ក្រសួងការបរទេសកម្ពុជា ធ្វើឡើងក្រោយជំនួបរវាងគណៈប្រតិភូដឹកនាំដោយលោក Derek Chollet និងរដ្ឋមន្ត្រីការបរទេសកម្ពុជា លោក ប្រាក់ សុខុន នៅទីស្ដីការក្រសួងការបរទេសកម្ពុជា កាលពីថ្ងៃទី១០ ខែធ្នូ។ ជំនួបនេះ ភាគីទាំងពីរបានបង្ហាញជំហរគាំទ្រដូចគ្នាចំពោះសារសំខាន់នៃតួនាទីរបស់អាស៊ាន។
តាមសេចក្ដីប្រកាសព័ត៌មានរបស់ក្រសួងការបរទេសកម្ពុជា កាលពីថ្ងៃទី១១ ខែធ្នូ ឲ្យដឹងថា ទីប្រឹក្សាក្រសួងការបរទេសសហរដ្ឋអាមេរិក លោក Derek Chollet បានអះអាងជាថ្មីថា អាស៊ានគឺជាចំណុចស្នូលនៃគោលនយោបាយការបរទេសរបស់សហរដ្ឋអាមេរិក នៅតំបន់ឥណ្ឌូ-ប៉ាស៊ីហ្វិក ដែលលោករំពឹងថា អាមេរិកនឹងមិនខកចិត្តទេចំពោះកម្ពុជាក្នុងនាមជាប្រធានអាស៊ាននៅឆ្នាំ២០២២ ខាងមុខ។ លោក Derek Chollet បន្តថា លោកប្រធានាធិបតី ចូ បៃឌិន ពិតជារំពឹងថាអាមេរិកនឹងធ្វើជាម្ចាស់ផ្ទះនៃកិច្ចប្រជុំកំពូលអាស៊ាន-អាមេរិក នៅទីក្រុងវ៉ាស៊ីនតោន នាពេលខាងមុខនេះ។
ចំណែកលោក ប្រាក់ សុខុន រដ្ឋមន្ត្រីការបរទេសកម្ពុជា បានថ្លែងស្វាគមន៍ជំហររបស់អាមេរិកជាមួយនឹងកម្ពុជាផង ជាមួយនឹងអាស៊ានផង។ លោកអះអាងថា កម្ពុជាបានត្រៀមខ្លួនរួចហើយក្នុងការបំពេញតួនាទីជាប្រធានអាស៊ានសម្រាប់ឆ្នាំ២០២២៕