កសិករមួយចំនួននៅខេត្តបាត់ដំបង បានបង្ខំចិត្តលក់ដីស្រែកេរឪពុកម្ដាយរបស់ខ្លួន ដើម្បីដោះបំណុល និងធ្វើដើមទុនរកស៊ី បន្ទាប់ពីតម្លៃស្រូវនៅបន្តធ្លាក់ថ្លៃខ្លាំងនៅឆ្នាំនេះ។ ក្រុមកសិករទាំងនោះអន់ចិត្តនឹងរដ្ឋាភិបាលថា មិនអាចដោះស្រាយវិបត្តិកសិផលធ្លាក់ថ្លៃជាច្រើនឆ្នាំមកហើយ បង្កឱ្យប៉ះពាល់ដល់ជីវភាពកសិករ។
កសិកររស់នៅភូមិតាគម ឃុំពាមឯក ស្រុកឯកភ្នំ លោក ជីម ជឿន បានប្រាប់សារព័ត៌មាន The Cambodia Daily នៅថ្ងៃទី៣ ខែធ្នូ ថា កសិករមួយចំនួននៅខេត្តបាត់ដំបង បង្ខំចិត្តបោះបង់មុខរបរធ្វើស្រែ ហើយធ្វើចំណាកស្រុកទៅប្រទេសថៃ ដើម្បីដោះបំណុលគេ ព្រោះមុខរបរនេះមិនអាចធ្វើឱ្យជីវភាពរបស់កសិករធូរស្រាលទេ។
លោកថា បច្ចុប្បន្នស្រូវផ្ការំដួល ១គីឡូក្រាមតម្លៃត្រឹមតែ ៧០០រៀលទៅដល់ ៨០០រៀល បើធៀបនឹងឆ្នាំមុនតម្លៃស្រូវប្រភេទនេះក្នុង ១គីឡូក្រាម ១ពាន់រៀល។ កសិករដដែលបន្ថែមថា គ្រួសារលោកធ្វើស្រែលើផ្ទៃដីជាង ២ហិកតារ ដែលរំពឹងថានឹងលក់ស្រូវដើម្បីសងបំណុល ប៉ុន្តែស្រូវបែរជាធ្លាក់ថ្លៃយ៉ាងគំហុក ធ្វើឱ្យពួកគាត់ខាតបង់ច្រើន។
កសិករនៅតំបន់អាងភាស៍ ឃុំពាមឯក ស្រុកឯកភ្នំ ខេត្តបាត់ដំបង ឱ្យដឹងថា តម្លៃស្រូវថោក ឬថ្លៃ អាស្រ័យលើមាត់ឈ្មួញកណ្តាល ហើយបញ្ហានេះកើតមានដដែលៗជាច្រើនឆ្នាំមកហើយ គ្មានដំណោះស្រាយពីរដ្ឋាភិបាលនៅឡើយទេ។
កសិករចោទថា ក្រុមហ៊ុនបៃតង (Bitang Cambodia. PLC) របស់ឧកញ៉ា ភួ ពុយ គឺជាឈ្មួញកណ្តាលដែលបានបន្ថោកតម្លៃស្រូវរបស់កសិករ ដើម្បីកេងចំណេញក្នុងពេលដែលពលរដ្ឋកំពុងត្រូវការប្រាក់បង្វិលសងធនាគារ និងបង់ថ្លៃម៉ាស៊ីនច្រូតកាត់។ កសិករលើកឡើងថា ក្រុមហ៊ុននេះតែងតែបន្ថោកតម្លៃស្រូវស្រេចតែអំពើចិត្ត ដែលធ្វើឱ្យកសិករជាច្រើនបាក់ទឹកចិត្ត ហើយបោះបង់មុខរបរកសិកម្ម។
សារព័ត៌មាន The Cambodia Daily នៅមិនទាន់អាចទាក់ទងតំណាងក្រុមហ៊ុន បៃតង របស់ឧកញ៉ា ភួ ពុយ បាននៅឡើយទេ នៅថ្ងៃទី០៣ ធ្នូ នេះ។
ប៉ុន្តែកន្លងទៅ រដ្ឋមន្ត្រីក្រសួងកសិកម្ម លោក វេង សាខុន តែងតែកោតសរសើរក្រុមហ៊ុននេះថាជាប់ចំណាត់ថ្នាក់លេខ១ ជាក្រុមហ៊ុនផ្គត់ផ្គង់អង្ករនាំចេញច្រើនជាងគេ និងជួយរក្សាតម្លៃស្រូវរបស់កសិករ។ ក្រសួងថា ក្រុមហ៊ុនបៃតង បានបង្កើតសហគមន៍កសិករ ឬហៅថាសហគមន៍បៃតងក្នុងខេត្តបាត់ដំបង និងខេត្តមួយចំនួនទៀត។
បន្ថែមពីនេះ សហគមន៍កសិករបានជួយដោះស្រាយតម្លៃទីផ្សារកសិផល និងតម្លៃស្រូវរក្សាលំនឹងទីផ្សារជាដើម ប៉ុន្តែសម្រាប់ប្រជាកសិករវិញមើលឃើញថា ការពិតជាក់ស្តែង ក្រុមហ៊ុនបៃតង របស់ឧកញ៉ា ភួ ពុយ បានទទួលទិញស្រូវពីប្រជាកសិករក្នុងតម្លៃទាបបំផុត។
ប្រភពពីកសិករដដែលបានឲ្យដឹងថា រដ្ឋាភិបាលតែងតែអួតពីក្រុមហ៊ុននេះជួយដល់កសិករ គឺគ្រាន់តែជាការសម្ដែងតែប៉ុណ្ណោះ ប៉ុន្តែធាតុពិតពុំមានការជួយជ្រោមជ្រែងពីធនាគារស្រូវ និងក្រុមហ៊ុនបៃតង របស់ឧកញ៉ា ភួ ពុយ នោះទេ។
កសិករអះអាងថា ប្រសិនបើតម្លៃស្រូវផ្ការំដួល និងស្រូវម្លិះមានតម្លៃចាប់ពី ១២០០រៀលដល់ ១៤០០រៀលក្នុងមួយគីឡូក្រាមឡើងទៅ ហើយស្រូវធម្មតាអាចលក់បានតម្លៃ ១ពាន់រៀលឡើងទៅ ទើបពួកគាត់អាចទទួលបានប្រាក់ចំណេញដោះស្រាយសេដ្ឋកិច្ចគ្រួសារគាប់ប្រសើរ៕