កូនស្រីច្បងរបស់ប្រធានគណបក្សសង្គ្រោះជាតិ រិះគន់ថា លោក សម រង្ស៊ី មានចេតនាបំភ្លៃវីរភាពអតីតដៃគូនយោបាយរបស់ខ្លួន គឺលោក កឹម សុខា ដែលបានជាប់ពន្ធនាគារ និងត្រូវបិទសិទ្ធិសេរីភាពរហូតដល់ពេលនេះថាជាមនុស្សកំសាក។
កូនស្រីច្បងរបស់លោក កឹម សុខា គឺកញ្ញា កឹម មនោវិទ្យា បានសរសេរលើទំព័រហ្វេសប៊ុករបស់ខ្លួននៅថ្ងៃទី១ ធ្នូ នេះថា ប្រហែលជាលោក សម រង្ស៊ី ពិតជាមិនដឹងអ្វីទាល់តែសោះទាក់ទិននឹងការតស៊ូដើម្បីបក្សប្រឆាំង ហើយការធ្វើសកម្មភាពនយោបាយកន្លងមករបស់លោក ក៏ប្រហែលជាចេះតែស្មានៗទៅដែរ ទើបលទ្ធផលជាក់ស្តែងដែលគាត់ធ្វើទាំងមិនច្បាស់លាស់ នាំគ្នាចាកចេញពីសមរភូមិនយោបាយនៅកម្ពុជាថាទង្វើមនុស្សឆ្លាត ប៉ុន្តែចុងក្រោយបែរជានាំគ្នារកច្រកដើម្បីចូលក្នុងស្រុកវិញនៅពេលនេះ។
កញ្ញា កឹម មនោវិទ្យា លើកឡើងថា ការបង្ហោះរូបសម្តេចក្រុមព្រះ នរោត្តម រណឫទ្ធិ និងរូបលោក កឹម សុខា រួមគ្នាក្នុងអត្ថន័យប្រមាថកិត្តិយស និងជីវិត ដែលថាលោក កឹម សុខា នឹងមានវាសនាដូចព្រះអង្គម្ចាស់ នរោត្តម រណឫទ្ធិ ពីសំណាក់លោក សម រង្ស៊ី នោះ ក៏ប្រហែលជាគាត់ស្មានថាការធ្វើបែបនេះ នឹងបង្ហាញឱ្យឃើញថាគាត់ជាមនុស្សដែលមានគុណធម៌ និងសីលធម៌ ហើយក្នុងឋានៈមេដឹកនាំនយោបាយនោះ។
កូនស្រីច្បងរបស់ប្រធានគណបក្សសង្គ្រោះជាតិរូបនេះ ក៏បានរិះគន់អនុប្រធានបក្សប្រឆាំងដែលស្និទ្ធនឹងលោក សម រង្ស៊ី គឺលោក អេង ឆៃអ៊ាង ផងដែរថា ការជំរុញឱ្យលោក សម រង្ស៊ី លាលែងពីតំណែងពីប្រធានគណបក្សសង្គ្រោះជាតិកាលពីពេលកន្លងទៅ ដើម្បីកេងចំណេញនយោបាយនោះ គ្រាន់តែជាការដឹកនាំនយោបាយខុសរបស់លោក អេង ឆៃអ៊ាង ប៉ុណ្ណោះ ហើយការដឹកនាំខុសដោយការសម្រេចយកមុខមាត់ក្នុងឆាកនយោបាយបែបនេះ បានក្លាយជាចំណុចនៃការបញ្ចប់ជីវិតនយោបាយរបស់លោក សម រង្ស៊ី ផងដែរ។ ដូច្នេះ លោក អេង ឆៃអ៊ាង មិនគួរធ្វើនយោបាយដោយគ្រាន់តែស្មានៗដូចលោកធ្លាប់ធ្វើនាពេលកន្លងមកនោះឡើយ។
ការរិះគន់នេះ ធ្វើឡើងបន្ទាប់ពីលោក សម រង្ស៊ី បានបង្ហោះរូបប្រធានគណបក្សសង្គ្រោះជាតិ និងព្រះអង្គម្ចាស់ នរោត្តម រណឫទ្ធិ ក្នុងខ្លឹមសារថា លោក កឹម សុខា នឹងមានវាសនាដូចសម្តេចក្រុមព្រះដែរនៅពេលដែលគ្មានរូបលោក។
កាលពីថ្ងៃទី២៩ ខែវិច្ឆិកា ឆ្នាំ២០២១ អតីតមេដឹកនាំបក្សប្រឆាំង លោក សម រង្ស៊ី បានបង្ហោះរូបប្រធានគណបក្សសង្គ្រោះជាតិ លោក កឹម សុខា និងប្រធានគណបក្សហ៊្វុនស៊ិនប៉ិច សម្តេចក្រុមព្រះ នរោត្តម រណឫទ្ធិ ដែលត្រូវបានអ្នកគាំទ្របក្សប្រឆាំងភាគីលោក សម រង្ស៊ី បកស្រាយថា ការបង្ហោះសារនេះ លោក សម រង្ស៊ី ចង់បង្ហាញថា វាសនារបស់លោក កឹម សុខា នឹងមិនខុសពីសម្តេចក្រុមព្រះ នរោត្តម រណឫទ្ធិ នោះឡើយនៅពេលដែលគ្មានលោក សម រង្ស៊ី។
អ្នកឃ្លាំមើលសង្គមរិះគន់ថា ការដឹកនាំនយោបាយរបស់អតីតមេដឹកនាំបក្សប្រឆាំង លោក សម រង្ស៊ី ពុំមានគោលការណ៍ច្បាស់លាស់ទេ ប៉ុន្តែមេដឹកនាំប្រឆាំងរូបនេះចូលចិត្តបង្កើតព្រឹត្តិការណ៍នយោបាយតាមអារម្មណ៍ខ្លួនឯង ដូចជាការធ្វើមាតុភូមិនិវត្តន៍ប្រកាសផ្តួលរំលំរដ្ឋាភិបាលលោក ហ៊ុន សែន ការប្រមាថព្រះមហាក្សត្រ និងការប្រកាសបង្កើតរដ្ឋាភិបាលក្រៅប្រទេសជាច្រើន ប៉ុន្តែការដឹកនាំរបស់លោកលើផែនការទាំងនោះ មិនទាន់មានផែនការមួយណានៅស្ថិតស្ថេរនោះឡើយ។
ប្រភពដដែលលើកឡើងថា បើលោក សម រង្ស៊ី គិតគូរពីផលប្រយោជន៍ជាតិពិតប្រាកដចំពោះស្ថានភាពរបស់កម្ពុជានៅពេលនេះ គាត់ត្រូវតែរក្សាជំហរ «សម រង្ស៊ី និង កឹម សុខា ជាមនុស្សតែមួយ» ដដែល មិនគួរចេញទៅគាំទ្របក្សចាស់របស់ខ្លួន ធ្វើឱ្យបែកបាក់ស្មារតីដើមរបស់គណបក្សសង្គ្រោះជាតិបែបនេះទេ។
កាលពីពេលដែលបណ្ឌិត កែម ឡី នៅមានជីវិត លោកធ្លាប់រិះគន់ដើម្បីកែលំអការដឹកនាំរបស់អតីតមេដឹកនាំបក្សប្រឆាំង លោក សម រង្ស៊ី ជាញឹកញាប់ផងដែរ ដើម្បីកុំឲ្យមេបក្សប្រឆាំងរូបនេះជ្រុលខ្លួននឹងល្បែងនយោបាយដែលធ្វើឲ្យខូចប្រយោជន៍ជាតិ។
ប៉ុន្តែជាការឆ្លើយតបនឹងការលើកឡើងរបស់បណ្ឌិត កែម ឡី ត្រូវសមាជិកបក្សប្រឆាំងដែលគាំទ្រលោក សម រង្ស៊ី នាំគ្នាជេរប្រមាថយ៉ាងធ្ងន់ធ្ងរ។ ជាងនេះទៀត ពួកគេបានលាបពណ៌បណ្ឌិត កែម ឡី ជាបន្លាយួន ធ្វើឱ្យរាំងស្ទះដំណើរការបក្សប្រឆាំងថែមទៀតផង៕