សមាគមគ្រូបង្រៀនកម្ពុជាឯករាជ្យ នឹងរៀបចំសន្និសីទសារព័ត៌មានដែលសម្របសម្រួលដោយប្រធានសហភាពសហជីពកម្ពុជា លោក រ៉ុង ឈុន នៅថ្ងៃអង្គារ ទី២៣ ក្រោយផ្អាកសកម្មភាពរបស់ខ្លួនអស់រយៈពេលជាច្រើនឆ្នាំ បន្ទាប់ពីលោក រ៉ុង ឈុន ត្រូវអាជ្ញាធរកម្ពុជាចាប់ខ្លួនកាលពីពេលកន្លងទៅ។
លេខាធិការដ្ឋានសមាគមគ្រូបង្រៀនកម្ពុជាឯករាជ្យ បានចេញសេចក្តីប្រកាសព័ត៌មាននៅថ្ងៃទី២២ ខែវិច្ឆិកា ឆ្នាំ២០២១ នេះថា សមាគមនឹងរៀបចំសន្និសីទកាសែតនៅឯហាងកាហ្វេ Coffee Culture ក្នុងសង្កាត់ទួលទំពូង២ ខណ្ឌចំការមន រាជធានីភ្នំពេញ ស្ដីពីជំហររបស់សកម្មជនបរិស្ថាន និងសិទ្ធិមនុស្ស បន្ទាប់ពីសកម្មជនទាំងនោះត្រូវបានដោះលែងឱ្យនៅក្រៅឃុំដោយអាជ្ញាធរកម្ពុជាកាលពីពេលថ្មីៗនេះ។
ប្រភពដដែលអំពាវនាវឱ្យអង្គការជាតិ អន្តរជាតិ ភ្នាក់ងារស្ថានទូតប្រចាំនៅកម្ពុជា អ្នកសារព័ត៌មានជាតិ និងអន្តរជាតិ ពិសេសស្ថាប័នពាក់ព័ន្ធ អញ្ជើញចូលរួមសន្និសីទកាសែតនេះ ដើម្បីផ្សព្វផ្សាយពីគោលជំហររបស់សកម្មជនបរិស្ថានក្រោយការចាប់ឃុំខ្លួនពីសំណាក់អាជ្ញាធរកម្ពុជា កាលពីពេលកន្លងទៅ។
ការចេញសេចក្តីជូនដំណឹងរបស់សមាគមគ្រូបង្រៀនឯករាជ្យនេះ ធ្វើឡើងដើម្បីផ្សព្វផ្សាយពីគោលជំហររបស់សកម្មជនបរិស្ថានដែលនឹងធ្វើការប្ដេជ្ញាចំពោះកិច្ចគាំពារធនធានធម្មជាតិនៅកម្ពុជាទៅថ្ងៃមុខបន្តទៀត។
នាយកប្រតិបត្តិមជ្ឈមណ្ឌលសម្ព័ន្ធភាពការងារ និងសិទ្ធិមនុស្ស លោក មឿន តុលា បានប្រាប់សារព័ត៌មាន The Cambodia Daily នៅថ្ងៃទី២២ វិច្ឆិកា នេះថា លោកគាំទ្រនូវជំហររបស់សកម្មជនបរិស្ថានក្នុងការចូលរួមកិច្ចការសង្គម ដើម្បីជួយការពារធនធានធម្មជាតិបន្តទៀត ព្រោះថាសកម្មភាពរបស់សកម្មជនបរិស្ថានទាំងនេះ គឺស្របនឹងផ្លូវច្បាប់របស់កម្ពុជា ហើយក៏ជាកាតព្វកិច្ចរបស់ប្រជាពលរដ្ឋខ្មែរផងដែរ។
លោកបន្តថា អាជ្ញាធរកម្ពុជាគួរតែពិនិត្យលើសកម្មភាពសកម្មជនបរិស្ថានឱ្យបានត្រឹមត្រូវ មុននឹងធ្វើសកម្មភាពរារាំង ព្រោះថាសកម្មភាពរបស់សកម្មជនបរិស្ថានក្នុងការការពារធនធានធម្មជាតិ មិនមែនជាបទល្មើសដែលផ្ទុយទៅផ្លូវច្បាប់ណាមួយនោះទេ។ ជាងនេះទៀត ទឹកចិត្តរបស់សកម្មជនទាំងនោះក៏មិនមែនដើម្បីបំផ្លាញជាតិក្នុងរូបភាពណាមួយនោះដែរ។
កាលពីថ្ងៃទី១០ ខែវិច្ឆិកា ឆ្នាំ២០២១ អង្គការសមាគមជាច្រើនដែលធ្វើការលើវិស័យបរិស្ថាននៅកម្ពុជា អំពាវនាវឱ្យរដ្ឋាភិបាលកម្ពុជាបង្កើតបរិយាកាសអំណោយផលដល់ការចូលរួមរបស់សហគមន៍មូលដ្ឋាន អង្គការសង្គមស៊ីវិល និងសកម្មជនបរិស្ថាន ក្នុងការអភិរក្ស ថែរក្សា ការពារធនធានធម្មជាតិ ស្របតាមរដ្ឋធម្មនុញ្ញមាត្រា៣៥ នៃច្បាប់ស្ដីពីតំបន់ការពារធម្មជាតិ និងច្បាប់ស្ដីពីព្រៃឈើ ជាដើម។
មាត្រា៣៥ នៃរដ្ឋធម្មនុញ្ញ ចែងថា ពលរដ្ឋខ្មែរទាំងពីរភេទមានសិទ្ធិចូលរួមយ៉ាងសកម្មក្នុងជីវភាពនយោបាយ សេដ្ឋកិច្ច សង្គមកិច្ច និងវប្បធម៌របស់ប្រទេសជាតិ ហើយសេចក្តីស្នើទាំងឡាយរបស់ប្រជាពលរដ្ឋ ត្រូវបានទទួលការពិនិត្យ និងដោះស្រាយយ៉ាងហ្មត់ចត់ពីអង្គការរដ្ឋ៕