រដ្ឋមន្ត្រីក្រសួងបរិស្ថាន អះអាងថា កម្ពុជាបានប្ដេជ្ញាចិត្តខ្ពស់ក្នុងការដោះស្រាយការប្រែប្រួលអាកាសធាតុ ដើម្បីការអភិវឌ្ឍដោយការលើកកម្ពស់ស្ថានភាពរបស់បុគ្គល និងក្រុមនានាឱ្យមានការចូលរួម និងទទួលផលពីសកម្មភាពនានារបស់សង្គមដោយមិនរើសអើង។ ប៉ុន្តែមហាជននៅតែមានចម្ងល់ថា ហេតុអ្វីកម្ពុជានៅតែមិនព្រមចូលរួមចុះហត្ថលេខាស្ដីពីការរួមគ្នាបញ្ឈប់ការបាត់បង់ព្រៃឈើលើសេចក្តីប្រកាសទីក្រុង Glasgow នៅពេលនេះ?
រដ្ឋមន្ត្រីក្រសួងបរិស្ថាន លោក សាយ សំអាល់ អះអាងនៅថ្ងៃទី១១ វិច្ឆិកា នេះថា ក្នុងនាមកម្ពុជាជាប្រទេសដែលបញ្ចេញឧស្ម័នផ្ទះកញ្ចក់តិចតួច តែកម្ពុជាបានបង្ហាញពីការប្ដេជ្ញាចិត្តខ្ពស់ក្នុងការដោះស្រាយការបម្រែបម្រួលអាកាសធាតុ តាមរយៈដាក់ឱ្យដំណើរការថាមពលពន្លឺព្រះអាទិត្យដែលមានទំហំជាង ៤០០មេហ្គាវ៉ាត់ដែលតំណាងឱ្យ ១៥% នៃប្រភពថាមពលរបស់ខ្លួន។
លោកអះអាងថា ក្រៅពីចាប់ផ្តើមដំណើរការថាមពលព្រះអាទិត្យ កម្ពុជានឹងមិនបង្កើតរោងចក្រថាមពលធ្យូងថ្មថ្មីបន្ថែមទៀតនោះទេ។ ជាងនេះទៀត រដ្ឋាភិបាលក៏នឹងមិនសាងសង់ទំនប់វារីអគ្គិសនីនៅតាមដងទន្លេមេគង្គទៀតដែរ។
កម្ពុជាប្ដេជ្ញាកាត់បន្ថយការបាត់បង់ព្រៃឈើត្រឹមពាក់កណ្តាលឆ្នាំ២០៣០ និងចូលរួមមិនឱ្យមានការបញ្ចេញឧស្ម័នពីព្រៃឈើត្រឹមឆ្នាំ២០៤០។
រដ្ឋមន្ត្រីក្រសួងបរិស្ថាន និងជាប្រធានក្រុមប្រឹក្សាជាតិអភិវឌ្ឍន៍កម្ពុជា លោក សាយ សំអាល់ បានលើកឡើងក្នុងកិច្ចប្រជុំកំពូលលើកទី២៦ នៃបណ្តាភាគីអនុសញ្ញាក្របខ័ណ្ឌសហប្រជាជាតិស្ដីពីការប្រែប្រួលអាកាសធាតុ (COP26) នៅទីក្រុងក្លាហ្កូ ចក្រភពអង់គ្លេស កាលពីថ្ងៃទី១០ ខែវិច្ឆិកា ឆ្នាំ២០២១ នេះថា កម្ពុជាកំពុងរៀបចំយុទ្ធសាស្ត្រអភិវឌ្ឍន៍រយៈពេលវែងប្រកបដោយអព្យាក្រឹតកាបូន ដើម្បីលើកកម្ពស់សកម្មភាពបញ្ចេញកាបូនតិច មានភាពធន់នឹងអាកាសធាតុ និងមានការអភិវឌ្ឍទៅថ្ងៃអនាគត។
ជុំវិញបញ្ហានេះ កាលពីថ្ងៃទី១០ ខែវិច្ឆិកា ឆ្នាំ២០២១ អង្គការសមាគមជិត ២០ស្ថាប័នដែលធ្វើការលើវិស័យបរិស្ថាននៅកម្ពុជា ស្នើឱ្យថ្នាក់ដឹកនាំសន្និសីទ COP26 ទាមទារឱ្យរដ្ឋាភិបាលកម្ពុជាគោរពការប្ដេជ្ញាចិត្តរបស់ខ្លួនដែលបានសន្យាក្នុងសន្និសីទ COP21 នៅទីក្រុងប៉ារីស ឆ្នាំ២០១៥ លើកិច្ចព្រមព្រៀងទីក្រុងប៉ារីស ស្ដីពីការប្រែប្រួលអាកាសធាតុ ព្រោះថារដ្ឋាភិបាលខ្មែរមិនបានអនុវត្តតាមការសន្យារបស់ខ្លួននៅឡើយទេ។ មិនត្រឹមតែប៉ុណ្ណោះ គឺបានផ្តល់ដីសម្បទានសេដ្ឋកិច្ចឱ្យក្រុមហ៊ុនឯកជនដែលបានបំផ្លាញព្រៃឈើកម្ពុជាយ៉ាងធ្ងន់ធ្ងរសព្វថ្ងៃនេះ។
ចាប់ពីថ្ងៃទី២ ខែវិច្ឆិកា មក ប្រទេសដែលបានចុះហត្ថលេខាលើសេចក្តីប្រកាសទីក្រុង Glasgow COP26 ស្ដីពីការរួមគ្នាបញ្ឈប់ការបាត់បង់ព្រៃឈើដើម្បីទប់ទល់ការផ្លាស់ប្ដូរអាកាសធាតុ មានចំនួន ១៣៧ប្រទេសហើយនៅពេលនេះ ខណៈចាប់ផ្តើមដំបូងមានត្រឹមតែ ១៣១ប្រទេសប៉ុណ្ណោះ ក្នុងនោះរួមមានចក្រភពអង់គ្លេស សហរដ្ឋអាមេរិក ប្រទេសចិន និងប្រទេសវៀតណាម ជាដើម ប៉ុន្តែរហូតមកទល់នឹងពេលនេះ ប្រទេសកម្ពុជានៅតែមិនទាន់បានចុះហត្ថលេខាលើសេចក្តីប្រកាសនេះជាមួយប្រទេសទាំងនោះនៅឡើយ។
ក្រុមអ្នកឃ្លាំមើលសង្គមបានជំរុញឱ្យរដ្ឋាភិបាលកម្ពុជា ដាក់ផែនការរយៈពេល ១០ឆ្នាំទៅថ្ងៃអនាគតក្នុងការដាំដើមឈើឡើងវិញឱ្យបាន ១ពាន់លានដើម ព្រោះថាព្រៃឈើមានតួនាទីសំខាន់មិនត្រឹមតែជួយកាត់បន្ថយការបំភាយឧស្ម័នផ្ទះកញ្ចក់ប៉ុណ្ណោះទេ ក៏អាចជួយកាត់បន្ថយគ្រោះទឹកជំនន់ ការទាក់ទាញឱ្យមានទឹកភ្លៀងទៀងទាត់ និងមានតួនាទីសំខាន់ដើម្បីជួយទប់ស្កាត់ការឡើងកម្ដៅផែនដី និងការប្រែប្រួលអាកាសធាតុលើពិភពលោកផងដែរ៕