អង្គការសមាគមដែលធ្វើការទាក់ទងនឹងការការពារបរិស្ថានជាច្រើន បានទាមទារឱ្យរដ្ឋាភិបាលកម្ពុជាគោរពការប្ដេជ្ញាចិត្តរបស់ខ្លួនដែលបានសន្យាក្នុងសន្និសីទ COP21 នៅទីក្រុងប៉ារីស ឆ្នាំ២០១៥ លើកិច្ចព្រមព្រៀងទីក្រុងប៉ារីស ស្ដីពីការប្រែប្រួលអាកាសធាតុ ខណៈរដ្ឋាភិបាលខ្មែរបានផ្តល់ដីសម្បទានសេដ្ឋកិច្ចឱ្យក្រុមហ៊ុនឯកជនដែលបានបំផ្លាញព្រៃឈើកម្ពុជាយ៉ាងធ្ងន់ធ្ងរសព្វថ្ងៃនេះ។
អង្គការសមាគមជិត ២០ស្ថាប័នដែលធ្វើការលើវិស័យបរិស្ថាននៅកម្ពុជា នៅថ្ងៃទី១០ ខែវិច្ឆិកា ឆ្នាំ២០២១ នេះ បានចេញសេចក្តីថ្លែងការណ៍រួមគ្នាអំពាវនាវឱ្យរដ្ឋាភិបាលកម្ពុជា និងថ្នាក់ដឹកនាំសន្និសីទអង្គការសហប្រជាជាតិស្ដីពីការប្រែប្រួលអាកាសធាតុលើកទី២៦ បញ្ជាក់ពីការប្ដេជ្ញាចិត្តពង្រឹងការអនុវត្តស្ដីពីការប្រែប្រួលអាកាសធាតុ ដែលកម្ពុជាជារដ្ឋភាគីហត្ថលេខីនៃកិច្ចព្រមព្រៀងសន្តិភាពទីក្រុងប៉ារីសដែរនោះ។
ប្រភពដដែលអះអាងថា ការចូលរួមការពារព្រៃឈើរបស់ភាគីពាក់ព័ន្ធ រួមមានសហគមន៍មូលដ្ឋាន សកម្មជនបរិស្ថាន អង្គការសមាគមដែលធ្វើការងារលើបញ្ហាបរិស្ថាន និងធនធានធម្មជាតិ គឺជាធាតុផ្សំមួយដ៏ចាំបាច់មិនអាចខ្វះបាន ដើម្បីជួយឱ្យរាជរដ្ឋាភិបាលកម្ពុជាអាចសម្រេចនូវការប្ដេជ្ញាចិត្តក្នុងការចូលរួមកាត់បន្ថយឧស្ម័នផ្ទះកញ្ចក់ និងអាចរក្សាគម្របព្រៃឈើឱ្យបាន ៦០ភាគរយត្រឹមឆ្នាំ២០៣០ ខាងមុខ។
អង្គការសមាគមការពារបរិស្ថានទាំងនេះបញ្ជាក់ថា រដ្ឋាភិបាលគួរតែបង្កើតបរិយាកាសអំណោយផលដល់ការចូលរួមរបស់សហគមន៍មូលដ្ឋាន អង្គការសង្គមស៊ីវិល និងសកម្មជនបរិស្ថានក្នុងការអភិរក្ស ថែរក្សា ការពារធនធានធម្មជាតិ ស្របតាមរដ្ឋធម្មនុញ្ញមាត្រា៣៥ នៃច្បាប់ស្ដីពីតំបន់ការពារធម្មជាតិ និងច្បាប់ស្ដីពីព្រៃឈើ ជាដើម។
អង្គការសមាគមដដែលស្នើឱ្យថ្នាក់ដឹកនាំ COP26 ដាក់សម្ពាធទៅកាន់សហភាពអឺរ៉ុបផងដែរ ដើម្បីឱ្យបញ្ឈប់ការនាំចូលឈើពីប្រទេសវៀតណាម ព្រោះថាប្រទេសវៀតណាម ត្រូវបានរកឃើញថាមានជាប់ពាក់ព័ន្ធនឹងការកាប់បំផ្លាញ និងនាំចូលឈើពីកម្ពុជាដោយខុសច្បាប់យ៉ាងច្រើនសន្ធឹកសន្ធាប់ក្នុងពេលបច្ចុប្បន្ននេះ។
អង្គការសមាគមជិត ២០ស្ថាប័នដែលធ្វើការលើវិស័យបរិស្ថាននៅកម្ពុជា ដូចជាសមាគមព្រៃឈើភ្នំសេះ ខេត្តក្រចេះ សមាគមការពារដីធ្លីខេត្តកោះកុង និងសមាគមជនជាតិដើមភាគតិចកួយ ខេត្តព្រះវិហារ ជាដើម បានចេញសេចក្តីថ្លែងការណ៍រួមនៅថ្ងៃទី១០ ខែវិច្ឆិកា ឆ្នាំ២០២១ ទាមទារឱ្យរដ្ឋាភិបាលកម្ពុជាបញ្ឈប់ការចាប់ខ្លួន ការឃុំខ្លួន និងការធ្វើទុក្ខបុកម្នេញលើសកម្មជនបរិស្ថានគ្រប់រូបភាពបន្តទៀត។
ចាប់ពីថ្ងៃទី២ ខែវិច្ឆិកា ឆ្នាំ២០២១ មក មានប្រទេសជាង ១៣០ ហើយ ដែលបានចុះហត្ថលេខាលើសេចក្តីប្រកាសទីក្រុង Glasgow COP26 ស្ដីពីការរួមគ្នាបញ្ឈប់ការធ្វើឲ្យបាត់បង់ព្រៃឈើ ដើម្បីទប់ទល់ការផ្លាស់ប្ដូរអាកាសធាតុ ក្នុងនោះរួមមានចក្រភពអង់គ្លេស សហរដ្ឋអាមេរិក ប្រទេសចិន និងប្រទេសវៀតណាម ជាដើម ប៉ុន្តែមកទល់នឹងពេលនេះ កម្ពុជានៅមិនទាន់បានចុះហត្ថលេខាលើសេចក្តីប្រកាសនេះជាមួយប្រទេសទាំងនោះនៅឡើយទេ។
ជុំវិញការកាប់បំផ្លាញព្រៃឈើនៅកម្ពុជា អង្គការឃ្លាំមើលព្រៃឈើពិភពលោក (The Global Initiative Against Transnational Organized Crime) បានចេញរបាយការណ៍កម្រាស់ជិត ៤០ទំព័រកាលពីចុងខែមីនា ឆ្នាំ២០២១ ស្ដីពីឧក្រិដ្ឋកម្មព្រៃឈើនៅកម្ពុជា ថានៅចន្លោះឆ្នាំ២០០១ ដល់ឆ្នាំ២០១៨ ប្រទេសកម្ពុជាបានបាត់បង់គម្របព្រៃឈើប្រមាណ ៥៥ម៉ឺន ៧ពាន់ហិកតារនៅក្នុងតំបន់ការពារព្រៃឈើដែលរងការកាប់បំផ្លាញ គឺជាប់ពាក់ព័ន្ធនឹងក្រុមហ៊ុនមួយចំនួនដែលកាន់កាប់ដោយជនជាតិវៀតណាម។
អង្គការឃ្លាំមើលព្រៃឈើអន្តរជាតិខាងលើបង្ហាញរបាយការណ៍របស់ខ្លួនថា ក្រុមហ៊ុនធំៗដែលពាក់ព័ន្ធនឹងការកាប់បំផ្លាញព្រៃឈើខ្មែរ រួមមាន៖
- ក្រុមហ៊ុន Think Biotech
- ក្រុមហ៊ុន Angkor Plywood
- ក្រុមហ៊ុន Sam Oeun Sovann
- ក្រុមហ៊ុន PNT
- និងក្រុមហ៊ុន Thy Nga Development ជាដើម ដែលទទួលបានសិទ្ធិវិនិយោគសម្បទានដីសេដ្ឋកិច្ចពីរដ្ឋាភិបាលកម្ពុជាក្នុងតំបន់អភិរក្សព្រៃឈើបច្ចុប្បន្ននេះ។
ប្រភពដដែលព្រមានថា បើទោះបីប្រទេសកម្ពុជាមានច្បាប់សម្រាប់ការពារព្រៃឈើក៏ដោយ ក៏កម្ពុជាបានទទួលរងនូវអត្រាកាប់បំផ្លាញព្រៃឈើខ្ពស់បំផុតក្នុងចំណោមប្រទេសមួយចំនួនចាប់តាំងពីទសវត្សរ៍ឆ្នាំ១៩៧០ មក៕