ក្រុមអ្នកឃ្លាំមើលការអនុវត្តសិទ្ធិមនុស្សនៅកម្ពុជា រិះគន់ថា ការអនុវត្តច្បាប់របស់កម្ពុជាហាក់មានភាពលម្អៀងទៅរកគណបក្សកាន់អំណាច ដែលបង្ហាញឲ្យឃើញតាមរយៈនៃការធ្វើទុក្ខបុកម្នេញ និងចាប់ខ្លួនតែអ្នករិះគន់រដ្ឋាភិបាល ដូចជាសកម្មជនបក្សជំទាស់ និងសកម្មជនសង្គមជាដើម។
អ្នកនាំពាក្យសមាគមការពារសិទ្ធិមនុស្សអាដហុក លោក ស៊ឹង សែនករុណា បានប្រាប់សារព័ត៌មាន The Cambodia Daily នៅថ្ងៃនេះថា ការលើកឡើង និងការរិះគន់នានារបស់អ្នកធ្វើការផ្នែកសិទ្ធិមនុស្សជុំវិញការអនុវត្តច្បាប់របស់រដ្ឋាភិបាលកម្ពុជា គឺដោយសារតែរដ្ឋាភិបាលមិនបានអនុវត្តច្បាប់របស់ខ្លួនឲ្យបានត្រឹមត្រូវ និងស្របតាមគោលការណ៍សិទ្ធិមនុស្សប៉ុណ្ណោះ មិនមែនជាការរិះគន់ដោយគ្មានហេតុផល និងគ្មានភស្តុតាងនោះទេ។
លោកអំពាវនាវឲ្យរដ្ឋាភិបាលកម្ពុជាហ៊ានប្រឈមមុខដោះស្រាយនឹងការរិះគន់នានាលើវិធានការដែលបានរំលោភសិទ្ធិពលរដ្ឋរបស់ខ្លួន ជាជាងចេះតែបន្តគេចវេសមិនទទួលខុសត្រូវ និងព្យាយាមដោះសាយករួចខ្លួន ព្រោះថាការធ្វើបែបនេះមិនមែនជាវិធីល្អក្នុងការជួយឲ្យកម្ពុជាមាននីតិរដ្ឋពេញលេញនោះទេ ប៉ុន្តែគឺជាការបំបាក់មុខកម្ពុជាលើឆាកអន្តជាតិប៉ុណ្ណោះ។
គណៈកម្មាធិការសិទ្ធិមនុស្សកម្ពុជា នៅថ្ងៃទី៧ ខែតុលា ឆ្នាំ២០២១ នេះបានចេញសេចក្តីប្រកាសព័ត៌មានរបស់ខ្លួនស្ដីពីបច្ចុប្បន្នភាពនៃស្ថានភាពសិទ្ធិមនុស្ស និងការអនុវត្តច្បាប់នៅកម្ពុជាថា រដ្ឋាភិបាលកម្ពុជាពិតជាមានឆន្ទៈខ្ពស់ក្នុងការលើកកម្ពស់ និងការពារសិទ្ធិមនុស្សខ្លាំងណាស់ ដែលស្តែងចេញតាមរយៈការផ្តល់សច្ចាប័ន និងការទទួលយកសន្ធិសញ្ញាសិទ្ធិមនុស្សនានាក្នុងការដឹកនាំរបស់ខ្លួន។
ប្រភពដដែលអះអាងថា កម្ពុជាបានលើកកម្ពស់ការអនុវត្តសិទ្ធិមនុស្សបានល្អប្រសើរជាច្រើន ដូចជាសិទ្ធិមនុស្សក្នុងស្ថានភាព Covid-19 ការបង្កើតស្ថាប័នសិទ្ធិមនុស្សជាតិ សេរីភាពនៃការបង្កើតសមាគមអង្គការក្រៅរដ្ឋាភិបាល សិទ្ធិទទួលព័ត៌មាន សេរីភាពនៃការជួបជុំសម្ដែងមតិ សេរីភាពនយោបាយ និងសេរីភាពជាច្រើនដទៃទៀតដែលប្រជាពលរដ្ឋអាចអនុវត្តបានដោយគ្មានការរារាំង។
ទាក់ទិននឹងបញ្ហានេះ កាលពីថ្ងៃទី១ ខែតុលា ឆ្នាំ២០២១ អ្នករាយការណ៍ពិសេសរបស់អង្គការសហប្រជាជាតិប្រចាំនៅកម្ពុជា លោក វិទិត មុនតាប៊ន (Vitit Muntarbhorn) បានចេញរបាយការណ៍ស្ដីពីស្ថានភាពសិទ្ធិមនុស្សនៅកម្ពុជាលើកដំបូងរបស់ខ្លួន ដែលរិះគន់រដ្ឋាភិបាលកម្ពុជាធ្ងន់ៗពីការអនុវត្តច្បាប់ដោយការរឹតត្បិតសេរីភាពបញ្ចេញមតិរបស់ពលរដ្ឋផងដែរ។
អ្នករាយការណ៍ពិសេសរូបនេះបញ្ជាក់ថា ការអនុវត្តច្បាប់របស់រដ្ឋាភិបាលកម្ពុជាបច្ចុប្បន្ន គឺលើសព្រំដែនកំណត់របស់ខ្លួន ដូចជាការប្រើច្បាប់ក្រមព្រហ្មទណ្ឌមាត្រា៤៩៤ មាត្រា៤៩៥ និងមាត្រានៃច្បាប់នេះមួយចំនួនទៀត ដើម្បីបំបិទសិទ្ធិសេរីភាពបញ្ចេញមតិដោយអហិង្សា និងចាប់ខ្លួនសកម្មជននានាដែលបង្ហាញពីការរំលោភលើសិទ្ធិមូលដ្ឋានរបស់ពលរដ្ឋយ៉ាងធ្ងន់ធ្ងរ។
ទាក់ទិននឹងបញ្ហារំលោភសិទ្ធិមនុស្សនៅប្រទេសកម្ពុជានេះ សហរដ្ឋអាមេរិកកាលពីថ្ងៃទី២៩ ខែកញ្ញា ឆ្នាំ២០២១ នេះ បានអនុម័តគាំទ្រឲ្យមានច្បាប់ស្ដីពីប្រជាធិបតេយ្យសម្រាប់កម្ពុជា Cambodia Democracy Act ឬហៅកាត់ថា H.R 4686 ដើម្បីដាក់ទណ្ឌកម្មលើមេដឹកនាំនៅកម្ពុជាដែលរំលោភសិទ្ធិមនុស្ស ជាន់ឈ្លីប្រព័ន្ធប្រជាធិបតេយ្យ និងការបំបិទសិទ្ធិសេរីភាពសារព័ត៌មាន ជាដើម ដើម្បីធានានូវការស្ដារឡើងវិញនូវសិទ្ធិមូលដ្ឋានរបស់ប្រជាពលរដ្ឋដែលកម្ពុជាបានផ្តល់សច្ចាប័នកន្លងមក៕