មន្ត្រីគណបក្សក្រៅរដ្ឋាភិបាល GDP ទាមទារឱ្យក្រសួងសុខាភិបាល បង្ហាញទិន្នន័យស្រាវជ្រាវអំពីមូលហេតុនៃអ្នកដែលបានស្លាប់ដោយសារជំងឺ Covid-19 និងប្រវត្តិនៃការឆ្លងជំងឺនេះផងដែរ ដើម្បីជួយឱ្យពលរដ្ឋមានការយល់ដឹងកាន់តែទូលំទូលាយក្នុងការរៀបចំជីវិតរៀនរស់នៅជាមួយ Covid-19។
ប្រធានគណៈកម្មាធិការនាយកនៃគណបក្សប្រជាធិបតេយ្យមូលដ្ឋាន បណ្ឌិត យ៉ង សាំងកុមារ បានប្រាប់សារព័ត៌មាននៅថ្ងៃនេះថា ដើម្បីឱ្យពលរដ្ឋអាចបើកដំណើរការសេដ្ឋកិច្ចរបស់ខ្លួនឡើងវិញ និងចេះរស់តាមគន្លងថ្មីជាមួយជំងឺ Covid-19 លុះត្រាតែក្រសួងសុខាភិបាលត្រូវចាក់វ៉ាក់សាំងជូនប្រជាពលរដ្ឋឱ្យបានគ្រប់គ្រាន់ តាមដានការឆ្លង និងដាក់ចេញនូវវិធានការផ្សេងៗ ការព្យាបាលអ្នកវិជ្ជមានវីរុស Covid-19 ឱ្យបានត្រឹមត្រូវ និងការវិភាគលើកត្តាអាទិភាពដែលអាចឱ្យអ្នកឆ្លងស្លាប់ដោយសារជំងឺនេះ។
លោកលើកឡើងថា ការឆ្លងវីរុស Covid-19 បានកើតឡើងប្រមាណ ២ឆ្នាំកន្លងមកហើយ ប៉ុន្តែក្រសួងសុខាភិបាល មិនទាន់បង្ហាញទិន្នន័យជាផ្លូវការណាមួយចំពោះកត្តាអាទិភាពដែលធ្វើឱ្យអ្នកឆ្លងវីរុស Covid-19 ស្លាប់នោះទេ។ ជាងនេះទៀត ក្រសួងក៏មិនបានបង្ហាញពីប្រវត្តិនៃអ្នកស្លាប់ថាបានចាក់វ៉ាក់សាំង ឬមិនបានចាក់វ៉ាក់សាំងនោះដែរ។ ដូច្នេះមានន័យថា ក្រសួងនៅតែមិនទាន់អាចកំណត់ក្រុមគោលដៅដែលជាហានិភ័យនៃការឆ្លងវីរុស Covid-19 បាននៅឡើយទេនៅពេលនេះ។
បណ្ឌិត យ៉ង សាំងកុមារ បញ្ជាក់ថា ការស្រាវជ្រាវ និងការបង្ហាញអំពីទិន្នន័យអ្នកទាំងនោះ គឺក្នុងគោលបំណងកំណត់មុខសញ្ញាឱ្យបានច្បាស់លាស់ដើម្បីផ្សព្វផ្សាយ និងដាក់វិធានការតាមភាពជាក់ស្តែងក្នុងការបញ្ចៀសកុំឱ្យពួកគេឆ្លង និងស្លាប់ដោយសារតែជំងឺ Covid-19 បន្តទៀត។
កាលពីពាក់កណ្តាលខែកញ្ញា ឆ្នាំ២០២១ ប្រមុខរដ្ឋាភិបាលកម្ពុជាអះអាងថា កម្ពុជាបានចាក់វ៉ាក់សាំងជូនប្រជាពលរដ្ឋបានច្រើនលើសលប់ដែលអាចការពារហានិភ័យនៃការឆ្លងវីរុស Covid-19 បាន។ លោក ហ៊ុន សែន បញ្ជាក់ថា អ្នកដែលស្លាប់ដោយសារជំងឺឆ្លងជាសកលនេះនៅសល់តែ ២% ប៉ុណ្ណោះមិនទាន់បានទទួលវ៉ាក់សាំងប្រឆាំងវីរុស Covid-19។
លោកនាយករដ្ឋមន្ត្រី ហ៊ុន សែន កាលពីថ្ងៃទី៣ ខែតុលា ឆ្នាំ២០២១ បានចេញសារាចរស្ដីពីការពង្រឹងវិធានការគ្រប់គ្រងការឆ្លងរាលដាលនៃជំងឺ Covid-19 សម្រាប់អំឡុងពេល និងក្រោយពេលឈប់សម្រាកក្នុងពិធីបុណ្យភ្ជុំបិណ្ឌ ដែលនឹងត្រូវរឹតបន្តឹងវិធានសុវត្ថិភាព និងត្រូវប្រកាន់ខ្ជាប់នូវវិធានការសុខាភិបាលឱ្យបានម៉ឺងម៉ាត់បន្ថែមទៀត។
ក្រសួងសុខាភិបាល បានអះអាងកាលពីថ្ងៃទី៤ ខែតុលា ឆ្នាំ២០២១ ឲ្យដឹងថា ក្រសួងបានចាក់វ៉ាក់សាំង Covid-19 ដល់មនុស្សពេញវ័យដូសទី១ បានជាង ១៣លាននាក់ រីឯដូសទី២ បានជាង ១១លាននាក់ផងដែរ។ ចំណែកអ្នកចាក់ដូសទី៣ ចំនួន ៩សែននាក់ ដោយឡែកកុមារក្រោមអាយុ ១៨ឆ្នាំចាក់បាន ៨៩,៦៨% និងកុមារក្រោមអាយុ ១២ឆ្នាំចាក់បាន ៩៣,៦៦% ផងដែរ។ បែបនេះក្តី ក្រសួងសុខាភិបាលក៏បានបង្ហាញរបាយការណ៍អំពីអ្នកឆ្លងវីរុស Covid-19 នៅថ្ងៃទី០៥ ខែតុលា ឆ្នាំ២០២១ នេះថា ក្រសួងនៅតែបន្តរកឃើញអ្នកឆ្លងវីរុស Covid-19 ថ្មីចំនួន ២២៨នាក់ និងអ្នកជាសះស្បើយថ្មីចំនួន ៤៨៥នាក់ ខណៈអ្នកស្លាប់ថ្មីមានចំនួន ១២នាក់។
ក្រសួងបញ្ជាក់ថា មកទល់នឹងពេលនេះ អ្នកឆ្លងវីរុស Covid-19 សរុបបានកើនឡើងដល់ជាង ១សែន ១ម៉ឺននាក់ហើយ និងអ្នកដែលជាសះស្បើយសរុបមានចំនួនជាង ១សែន ៥ពាន់នាក់ ខណៈអ្នកស្លាប់សរុបបានកើនឡើងជាង ២៤០០នាក់ផងដែរ៕