ក្រុមអ្នកឃ្លាំមើលសិទ្ធិមនុស្សនៅកម្ពុជា លើកឡើងថា ភាពមិនប្រក្រតីនៅមជ្ឈមណ្ឌលព្យាបាលជំងឺ Covid-19 អូឡាំពិក ត្រូវបានពលរដ្ឋរិះគន់ជាបន្តបន្ទាប់កន្លងមក ប៉ុន្តែដើម្បីឱ្យជាក់ច្បាស់ និងចៀសវាងការចោទប្រកាន់ និងការប្រកែកដោះសា ដូច្នេះអាជ្ញាធរត្រូវតែបើកការស៊ើបអង្កេតឱ្យបានច្បាស់លាស់លើករណីនេះ។
នាយកប្រតិបត្តិមជ្ឈមណ្ឌលសម្ព័ន្ធភាពការងារ និងសិទ្ធិមនុស្ស លោក មឿន តុលា បានប្រាប់សារព័ត៌មាន The Cambodia Daily នៅថ្ងៃទី២៨ កញ្ញា ថា ការស៊ើបអង្កេតលើភាពមិនប្រក្រតីនេះ គឺដើម្បីរក្សាកិត្តិយសរបស់អាជ្ញាធរ និងដើម្បីឱ្យដឹងច្បាស់ថា តើករណីនេះកើតមានមែនដែរឬក៏អត់? តើមន្ត្រីរូបណាជាអ្នកប្រព្រឹត្តអំពើពុករលួយនេះ?
លោកលើកឡើងទៀតថា ប្រសិនបើករណីនេះជាការពិតមែននោះ អាជ្ញាធរត្រូវតែមានវិធានការទប់ស្កាត់ការប្រព្រឹត្តអំពើមិនត្រឹមត្រូវទាំងនេះឱ្យបានទាន់ពេលផងដែរ និងដើម្បីកុំឱ្យករណីបែបនេះរីករាលដាលក្នុងសង្គមបន្តទៀត។
លោកអះអាងថា ប្រសិនបើអាជ្ញាធររដ្ឋបណ្តោយឱ្យអំពើមិនល្អបែបនេះកើតមានបន្តទៀតនោះ វានឹងជះឥទ្ធិពលអាក្រក់កាន់តែខ្លាំងដល់ជីវភាព និងការជឿទុកចិត្តរបស់ពលរដ្ឋលើការរៀបចំរបស់រដ្ឋាភិបាលកម្ពុជា ព្រោះថាក្នុងស្ថានភាពដ៏លំបាកនេះ ពលរដ្ឋកំពុងតែបាត់បង់ប្រាក់ចំណូល និងភ័យព្រួយពីសុខភាពរបស់ខ្លួន ប៉ុន្តែបែរជាមានការជំរិតទារប្រាក់ក្រោមរូបភាពជួយសង្គ្រោះ ដែលនឹងធ្វើឱ្យពលរដ្ឋកាន់តែជួបការលំបាកពីលើផលប៉ះពាល់នៃជំងឺ Covid-19 នេះថែមមួយកម្រិតទៀត។
លោក មឿន តុលា អំពាវនាវឱ្យរដ្ឋាភិបាល និងក្រសួងពាក់ព័ន្ធ ទប់ស្កាត់នូវភាពមិនប្រក្រតីដែលកើតមាននៅតាមមណ្ឌលព្យាបាលជំងឺ Covid-19 ឱ្យបានល្អ ដើម្បីធានានូវការថែរក្សា និងព្យាបាលពលរដ្ឋឱ្យមានប្រសិទ្ធភាពខ្ពស់។ ជាងនេះទៀត លោកជំរុញឱ្យក្រសួងសុខាភិបាល យកចិត្តទុកដាក់សម្រួលការស្នាក់នៅតាមមណ្ឌលចត្តាឡីស័កឱ្យមានបន្ទប់ទឹក និងកន្លែងស្នាក់នៅចែកដាច់ពីគ្នារវាងបុរស និងស្ត្រីផងដែរ។
កាលពីថ្ងៃទី២៧ ខែកញ្ញា ឆ្នាំ២០២១ អ្នកនាំពាក្យកងរាជអាវុធហត្ថលើផ្ទៃប្រទេស លោក អេង ហ៊ី បានចេញសេចក្តីប្រកាសព័ត៌មានឆ្លើយតបទៅនឹងការចោទប្រកាន់ពីសំណាក់ប្រជាពលរដ្ឋលើកងកម្លាំងរាជអាវុធហត្ថ ដែលប្រចាំការនៅគោលដៅមណ្ឌលព្យាបាលជំងឺ Covid-19 ថា កម្លាំងកងរាជអាវុធហត្ថមិនបានប្រចាំការនៅទីតាំងដែលបានប្រព្រឹត្តអំពើពុករលួយនោះទេ។
អ្នកនាំពាក្យរូបនេះបញ្ជាក់ថា មណ្ឌលសម្រាកព្យាបាលជំងឺ Covid-19 ដែលកងកម្លាំងរាជអាវុធហត្ថប្រចាំការកន្លងមក គឺមានតែ ៤ទីតាំងប៉ុណ្ណោះ គឺនៅសណ្ឋាគារ Great Duke វិទ្យាល័យ ជា ស៊ីម សាមគ្គី មជ្ឈមណ្ឌលព្រីមៀសែនសុខ និងមន្ទីរពេទ្យហ្លួងម៉ែ ហើយបច្ចុប្បន្ននេះ កងកម្លាំងរបស់ខ្លួនប្រចាំការនៅតែ ២គោលដៅប៉ុណ្ណោះ គឺព្រីមៀសែនសុខ និងមន្ទីរពេទ្យហ្លួងម៉ែ។
សេចក្តីប្រកាសព័ត៌មាននេះ ធ្វើឡើងបន្ទាប់ពីប្រជាពលរដ្ឋបានលើកឡើងពីការប្រព្រឹត្តអំពើពុករលួយនៅមជ្ឈមណ្ឌលព្យាបាលជំងឺ Covid-19 អូឡាំពិក ថាមន្ត្រីអាវុធហត្ថដែលប្រចាំការនៅមជ្ឈមណ្ឌលព្យាបាលនេះតែងបង្កបញ្ហាជាប្រចាំ ដូចជាការបំពេញការងារមិនច្បាស់លាស់ គ្មានសណ្ដាប់ធ្នាប់ ការនិយាយស្តីគ្មានសុជីវធម៌។ ជាងនេះទៀត ប្រសិនបើក្រុមគ្រួសារចង់យកអីវ៉ាន់ចូលទៅឱ្យអ្នកជំងឺនៅខាងក្នុង ដូចជាសម្ភារៈប្រើប្រាស់ប្រចាំថ្ងៃជាដើម ទាល់តែបង់លុយ ទើបអាជ្ញាធរនៅទីនោះអនុញ្ញាតឱ្យយកចូលទៅ។
ពហុកីឡដ្ឋានជាតិអូឡាំពិក ត្រូវបានប្រើប្រាស់ជាមជ្ឈមណ្ឌលព្យាបាលជំងឺ Covid-19 តាំងពីអំឡុងខែកក្កដា ឆ្នាំ២០២១ ដែលអាចទទួលអ្នកជំងឺ Covid-19 បានជិត ៥ពាន់នាក់ ដែលមានកន្លែងព្យាបាលអ្នកជំងឺស្រាល មធ្យម និងធ្ងន់ ក្នុងនោះក៏មានក្រុមគ្រូពេទ្យប្រចាំការសម្រាប់ព្យាបាលជាង ១ពាន់នាក់ផងដែរ ដែលមជ្ឈមណ្ឌលនេះបានក្លាយជាកន្លែងព្យាបាលជំងឺ Covid-19 ធំជាងគេនៅទូទាំងប្រទេស។
គិតមកទល់នឹងពេលនេះ មណ្ឌលព្យាបាលជំងឺ Covid-19 នៅរាជធានីភ្នំពេញមានចំនួន ១១មណ្ឌល ដូចជាមណ្ឌលព្យាបាលមន្ទីរពេទ្យហ្លួងម៉ែ មណ្ឌលព្យាបាល ឌឹ ព្រីមៀ សែនសុខ និង The Great Duke ជាដើម ខណៈកាលពីពេលកន្លងទៅមានមជ្ឈមណ្ឌលសម្រាប់ព្យាបាលជំងឺ Covid-19 ដល់ទៅ ១៧មណ្ឌលឯណោះនៅទូទាំងរាជធានីភ្នំពេញ។
មកទល់នឹងពេលនេះ សារព័ត៌មាន The Cambodia Daily មិនទាន់អាចទាក់ទងអ្នកគ្រប់គ្រងមណ្ឌលព្យាបាលជំងឺ Covid-19 នៅពហុកីឡដ្ឋានជាតិអូឡាំពិក លោក ញ៉ិប អង្គារបុស្ស ដើម្បីបំភ្លឺជុំវិញពីការចោទប្រកាន់នេះបាននៅឡើយទេ៕