ក្រុមអ្នកឃ្លាំមើលសិទ្ធិមនុស្សនៅកម្ពុជា អះអាងថា ករណីប្រើអំពើហិង្សាធ្ងន់ធ្ងរលើអ្នកធ្វើដំណើរជាស្ត្រីពីសំណាក់មន្ត្រីនគរបាលចរាចរណ៍ផ្លូវគោក ដែលបណ្តាលឱ្យរបួសធ្ងន់ធ្ងរនោះ ថាត្រូវតែកែលំអក្រុមមន្ត្រីទាំងនោះជាបន្ទាន់ និងមានវិធានការផ្លូវច្បាប់ជាក់លាក់ដើម្បីធានាដល់សុវត្ថិភាពរបស់ពលរដ្ឋគ្រប់រូប។
សាររិះគន់របស់អ្នកស្រី ចក់ សុភាព នាយកប្រតិបត្តិមជ្ឈមណ្ឌលសិទ្ធិមនុស្សកម្ពុជា ហៅកាត់ថា CCHR ធ្វើឡើងបន្ទាប់ពីមានករណីហិង្សាមួយកើតឡើងលើស្ត្រីខ្មែរម្នាក់ពីសំណាក់នគរបាលចរាចរណ៍ ដែលបានដាក់ពង្រាយកម្លាំងអនុវត្តច្បាប់ចរាចរណ៍ផ្លូវគោកដើម្បីត្រួតពិនិត្យការបើកបរខុសបច្ចេកទេសកាលពីពេលថ្មីៗនេះ។
អ្នកស្រី ចក់ សុភាព បានសរសេរលើគណនី Facebook របស់ខ្លួននៅថ្ងៃទី៩ ខែកញ្ញា ឆ្នាំ២០២១ ថា ការដាក់កម្លាំងអនុវត្តច្បាប់ចរាចរណ៍ផ្លូវគោកគួរតែកែសម្រួលឡើងវិញ ដើម្បីសុវត្ថិភាពរបស់ពលរដ្ឋគ្រប់គ្នា ព្រោះថាមន្ត្រីមួយចំនួនមិនបានគោរពវិជ្ជាជីវៈ និងមិនបានប្រកាន់ខ្ជាប់ស្មារតីអហិង្សា ហើយតែងប្រើអាវុធដើម្បីគំរាមកំហែងលើពលរដ្ឋស្លូតត្រង់នាពេលកន្លងមកផងដែរ។
អ្នកស្រីរិះគន់ថា ស្លាកសញ្ញាស្ដីពីការណែនាំឱ្យពលរដ្ឋយល់ដឹងពីការគោរពច្បាប់ផ្សេងៗ ឬច្បាប់ចរាចរណ៍ជាដើម ហាក់ពុំមានការផ្សព្វផ្សាយនៅតាមផ្លូវសាធារណៈដូចស្លាកសញ្ញាពាណិជ្ជកម្មស្រាបៀនោះទេ។ ដោយឡែកការអនុវត្តច្បាប់របស់សមត្ថកិច្ច ក៏ហាក់មិនត្រឹមត្រូវថែមទៀត ក្នុងនោះមានករណីមិនត្រឹមត្រូវជាច្រើនបានកើតឡើង ដូចជាការពួនស្ទាក់ចាំចាប់ពលរដ្ឋដែលបើកបរខុសបច្ចេកទេសច្បាប់ចរាចរណ៍ ជាជាងជួយណែនាំឱ្យពួកគេយល់ដឹង និងអនុវត្តច្បាប់ឱ្យបានត្រឹមត្រូវ។
អ្នកស្រី ចក់ សុភាព ក៏បានក្រើនរំឭកដល់ប្រជាពលរដ្ឋផងដែរថា ការគោរពច្បាប់ចរាចរណ៍មិនត្រឹមតែជាកាតព្វកិច្ចជាពលរដ្ឋនោះទេ ប៉ុន្តែការគោរពច្បាប់នេះ គឺដើម្បីសុវត្ថិភាពខ្លួនឯង និងអ្នកជាទីស្រឡាញ់របស់ខ្លួន ព្រមទាំងអ្នកដទៃដែលស្ថិតលើដងផ្លូវជាមួយនឹងខ្លួនថែមទៀត។ ដូច្នេះ ក្នុងស្មារតីជាពលរដ្ឋល្អ គួរតែភ្ញាក់រឭកអនុវត្តច្បាប់ដោយខ្លួនឯង មិនគួរទាល់តែសមត្ថកិច្ចដាក់កម្លាំងចាប់ឃាត់ណែនាំនោះឡើយ។
កាលពីថ្ងៃទី៨ ខែកញ្ញា ឆ្នាំ២០២១ ស្ត្រីរងគ្រោះឈ្មោះ និច បានធ្វើដំណើរពីរនាក់ប្អូនដោយជិះម៉ូតូមិនបានពាក់មួកការពារសុវត្ថិភាព។ ប៉ុន្តែពេលទៅដល់ទីតាំងកើតហេតុ បានឃើញនគរបាលពង្រាយកម្លាំងចាប់អ្នកធ្វើដំណើរដែលមិនគោរពតាមបច្ចេកទេសចរាចរណ៍ត្រឹមត្រូវ ពេលនោះស្ត្រីរងគ្រោះក៏ត្រឡប់ក្រោយបំណងគេចចេញពីនគរបាលចរាចរណ៍ទាំងនោះ តែត្រូវនគរបាលម្នាក់យកវិទ្យុទាក់ទងវាយត្រូវក្បាលស្ត្រីដែលជិះខាងក្រោយបែកក្បាលឈាមស្រោចខ្លួន។
ក្រោយការជជែកតវ៉ាគ្នា និងមានអ្នកថតបង្ហោះហេតុការណ៍នេះលើបណ្ដាញសង្គម Facebook មន្ត្រីនគរបាលដែលជាជនបង្កឈ្មោះ ម៉ាត់ ពិសី ជាមន្ត្រីអន្តរាគមន៍នៃអធិការដ្ឋាននគរបាលខណ្ឌ៧មករា ចោទថា ស្ត្រីរូបនោះប្រឹងសម្ដែងដើម្បីឱ្យមហាជនមើលតែប៉ុណ្ណោះ។ ប៉ុន្តែបន្តិចក្រោយមក ក្រុមនគរបាលទាំងនោះបានដកកម្លាំងរបស់ខ្លួនចេញពីទីតាំងកើតហេតុ ដែលស្ថិតក្នុងសង្កាត់វាលវង់ ខណ្ឌ៧មករា រាជធានីភ្នំពេញអស់តែម្តង។
ជុំវិញបញ្ហានេះ ស្នងការដ្ឋាននគរបាលរាជធានីភ្នំពេញ បានបំភ្លឺលើទំព័រ Facebook របស់ខ្លួននៅថ្ងៃទី៩ ខែកញ្ញា ឆ្នាំ២០២១ ថា សមត្ថកិច្ចឃាត់ខ្លួនមន្ត្រីអន្តរាគមន៍ដែលបានបង្កឲ្យស្ត្រីរងគ្រោះរបួសបែកក្បាលនោះរួចហើយបន្ទាប់ពីកើតហេតុភ្លាមៗ។
ប្រភពដដែលអះអាងថា សមត្ថកិច្ចនឹងឱ្យមន្ត្រីបង្កហេតុជួបជាមួយគ្រួសារជនរងគ្រោះចរចាគ្នារឿងសំណងថ្លៃព្យាបាល ហើយប្រសិនបើជនរងគ្រោះមិនសុខចិត្តទេនោះ សមត្ថកិច្ចនឹងអនុវត្តបន្តដោយកសាងសំណុំរឿងបញ្ជូនទៅតុលាការ ដើម្បីអនុវត្តតាមនីតិវិធីច្បាប់។ ប៉ុន្តែបើជនរងគ្រោះព្រមទទួលសំណងបញ្ចប់រឿង ក៏ត្រូវអនុវត្តតាមវិន័យកងកម្លាំងរបស់នគរបាលផងដែរ។
ជុំវិញបញ្ហានេះ ក្រុមអ្នកសង្កេតការណ៍រិះគន់ថា ការបង្កអំពើហិង្សាលើជនរងគ្រោះដោយគេចមិនទទួលខុសត្រូវរបស់ក្រុមសមត្ថកិច្ចទាំងនេះ បង្ហាញពីការមិនយកចិត្តទុកដាក់របស់កម្លាំងនគរបាលលើសុវត្ថិភាពរបស់ពលរដ្ឋនោះទេ តែបែរជាបង្ហាញនូវរូបភាពធ្វើបាប និងគំរាមលើសុវត្ថិភាពរបស់ពលរដ្ឋទៅវិញ៕