ស្ថានទូតឥណ្ឌា ប្រចាំនៅកម្ពុជា បានស្នើឲ្យអាជ្ញាធរជំនាញរបស់កម្ពុជា ត្រៀមយកសាច់ក្របីដែលនាំចូលពីប្រទេសឥណ្ឌា ហើយអាជ្ញាធរកម្ពុជារកឃើញមានផ្ទុកមេរោគ Covid-19 និងយកទៅដុតចោលនៅស្រុកឱរ៉ាល់ ខេត្តកំពង់ស្ពឺ នៅថ្ងៃទី២៧ ខែកក្កដា មកពិនិត្យឡើងវិញ ដោយសារតែឥណ្ឌា ហាក់មិនអស់ចិត្តថាសាច់ក្របីដែលចេញពីឥណ្ឌា មកកម្ពុជា មានវីរុស Covid-19 នោះទេ។
សារព័ត៌មានថ្មីៗបានដកស្រង់ខ្លឹមសារលិខិតដែលស្ថានទូតឥណ្ឌា បានផ្ញើទៅកាន់អង្គភាពខ្លួនថា សាច់ក្របីដែលកម្ពុជារកឃើញ Covid-19 នេះ គឺមានការត្រួតពិនិត្យពីមន្ទីរពិសោធន៍ឥណ្ឌា ស្របតាមស្តង់ដារ ISO ត្រឹមត្រូវ ហើយមុននាំចេញមកកម្ពុជា គឺសាច់ក្របីទាំងនោះត្រូវបានរកឃើញអវិជ្ជមាន Covid-19 គឺមានន័យថាមិនមានផ្ទុកមេរោគ Covid-19 ឡើយ។
ប្រភពដដែលបានដកស្រង់ខ្លឹមសារលិខិតរបស់ស្ថានទូតឥណ្ឌា ទៀតថា នៅក្នុងទិដ្ឋភាពនៃលទ្ធផល (សាច់ក្របី) ផ្ទុយគ្នារវាងឥណ្ឌា និងកម្ពុជា នេះ អ្នកជំនាញឥណ្ឌា តាមរយៈស្ថានទូតឥណ្ឌា ប្រចាំកម្ពុជា និងអ្នកនាំចូលសាច់ក្របីមកកម្ពុជា បានស្នើសុំឱ្យក្រសួងសុខាភិបាល និងគណៈកម្មាធិការប្រយុទ្ធប្រឆាំងជំងឺ Covid-19 ធ្វើតេស្ដលើសាច់ថ្មីៗពីកុងតឺន័រតែមួយ ដើម្បីបញ្ជាក់លទ្ធផលនៃការធ្វើតេស្ដ។ ប្រសិនបើអាច យកសាច់ក្របីនោះធ្វើតេស្ដនៅក្នុងមន្ទីរពិសោធន៍ទំនើបមួយនៅប្រទេសសិង្ហបុរី។
បន្ថែមពីនេះ ស្ថានទូតឥណ្ឌា បានពន្យល់ទៀតថា សាច់ក្របីនេះត្រូវបាននាំចេញពីប្រទេសឥណ្ឌា តាំងពីខែមេសា ហើយនាំមកដល់កម្ពុជា នៅខែកក្កដា។ ដូច្នេះ វាគ្មានភស្តុតាងវិទ្យាសាស្ត្របង្ហាញថា វីរុស Covid-19 អាចរស់បានលើសម្ភារវេចខ្ចប់អាហារ និងចំណីអាហារក្នុងរយៈពេលជិត ៣ខែនេះទេ។
ទោះយ៉ាងណា អភិបាលខេត្តកំពង់ស្ពឺ លោក វ៉ី សំណាង បានឲ្យប្រព័ន្ធផ្សព្វផ្សាយក្នុងស្រុកដឹងថា សាច់ក្របីទាំងនោះនឹងត្រូវនាំយកទៅដុតបំផ្លាញចោលនៅមូលដ្ឋានស្រុកឱរ៉ាល់ ខេត្តកំពង់ស្ពឺ ក្នុងរយៈពេល ២-៣ថ្ងៃខាងមុខទៀតនេះ ហើយលោកណែនាំឲ្យពលរដ្ឋបង្កើនការប្រុងប្រយ័ត្នចំពោះការឆ្លងរាលដាលនៃជំងឺ Covid-19 នេះផងដែរ។
កាលពីពេលថ្មីៗនេះ ស្ថានទូតឥណ្ឌា ប្រចាំកម្ពុជា បានបញ្ជាក់ថា ប្រទេសឥណ្ឌា គឺជាទីផ្សារដ៏ធំមួយនៃការផ្គត់ផ្គង់សាច់ក្របី និងអាហារនានា ហើយកម្ពុជាក៏បាននាំចូលសាច់ក្របីពីឥណ្ឌា ក្នុងតម្លៃ ១៧,៧លានដុល្លារកាលពីឆ្នាំ២០២០ គឺកើនឡើងពី ៦,៤លានដុល្លារធៀបឆ្នាំ២០១៩។
កាលពីថ្ងៃទី១ ខែឧសភា ឆ្នាំ២០២១ រដ្ឋាភិបាលកម្ពុជា បានសម្រេចហាមឃាត់មិនឲ្យនាំចូលសាច់បង្កក និងទំនិញបង្កកផ្សេងទៀតដែលមានហានិភ័យខ្ពស់ ហើយមានប្រភពពីប្រទេសឥណ្ឌា ដើម្បីទប់ស្កាត់ការរីករាលដាលជំងឺ Covid-19 ដោយសារប្រទេសឥណ្ឌា ផ្ទុះឆ្លងជំងឺ Covid-19 ធ្ងន់ធ្ងរជាថ្មីទៀត៕