ស្នងការនគរបាលខេត្តព្រះសីហនុ បានឲ្យដឹងថា នៅថ្ងៃសុក្រ ទី២៣ ខែកក្កដា ឆ្នាំ២០២១ កម្លាំងជំនាញរបស់លោក បានកសាងសំណុំរឿងបញ្ជូនជនសង្ស័យជនជាតិចិន ៤នាក់ និងភស្តុតាងទៅកាន់សាលាដំបូងខេត្តព្រះសីហនុ ដើម្បីផ្ដន្ទាទោសពាក់ព័ន្ធបទល្មើសចាប់ជំរិតមនុស្សទារប្រាក់។
លោក ជួន ណារិន បានបន្តថា កម្លាំងជំនាញបានឃាត់ខ្លួនជនសង្ស័យជាជនជាតិចិន ៤នាក់កាលពីថ្ងៃទី២១ ខែកក្កដា ដែលបានធ្វើសកម្មភាពចាប់ជនជាតិចិនម្នាក់ញាត់បញ្ចូលក្នុងរថយន្ត រួចក៏បើកបម្រុងគេចខ្លួន ប៉ុន្តែត្រូវកម្លាំងជំនាញដេញតាម និងឈានទៅឃាត់ខ្លួនជនល្មើសទាំង ៤នាក់ ហើយរំដោះជនរងគ្រោះដោយសុវត្ថិភាព។
លោក ជួន ណារិន បន្តថា ប្រតិបត្តិការនេះ សមត្ថកិច្ចជំនាញបានដកហូតភស្តុតាងរថយន្ត ១គ្រឿងម៉ាក LAND CRUISER PRADO ចំណែកឯជនសង្ស័យទាំង ៤នាក់បានបញ្ជូនទៅកាន់សាលាដំបូងខេត្តព្រះសីហនុ ដើម្បីបន្តនីតិវិធី។
ទោះយ៉ាងណា ប្រជាពលរដ្ឋរស់នៅខេត្តព្រះសីហនុ ក៏បានកត់សម្គាល់ដែរថា បទល្មើសចាប់ជំរិតមនុស្សទារប្រាក់ និងបទល្មើសគ្រឿងញៀនដែលមានជនល្មើសជាជនជាតិចិន បានកម្រើកជាបណ្តើរៗវិញហើយនៅក្នុងក្រុងទេសចរណ៍ជាប់ឆ្នេរសមុទ្រមួយនេះ ក្រោយបទល្មើសទាំងនេះបានស្ងប់ស្ងាត់ក្រោយមូលដ្ឋាននេះផ្ទុះរាតត្បាតជំងឺ Covid-19 ធ្ងន់ធ្ងរចាប់តាំងពីដើមឆ្នាំ២០២១ មក៕