គណៈកម្មាធិការរៀបចំព្រឹត្តិការណ៍អូឡាំពិក ក្រុងតូក្យូ បានសម្រេចកាលពីថ្ងៃព្រហស្បតិ៍ ទី៨ កក្កដា ថា ព្រឹត្តិការណ៍អូឡាំពិកត្រូវតែធ្វើឡើងទោះជាគ្មានអ្នកទស្សនាក៏ដោយ ខណៈទីក្រុងនេះឈានដល់ស្ថានភាពគ្រាអាសន្នលើកទី៤ នៃការឆ្លងរាលដាលនៃជំងឺកូវីដ-១៩។
បន្ទាប់ពីបានប្រកាសមិនអនុញ្ញាតឱ្យអ្នកទស្សនាចូលទៅក្នុងព្រឹត្តិការណ៍នោះ គឺគណៈកម្មាធិការរៀបចំបានពិគ្រោះយោបល់ជាមួយអាជ្ញាធរនៅក្រុងកាណាហ្គាវ៉ា Saitama និងក្រុង Chiba ដោយបានសម្រេចរៀបចំព្រឹត្តិការណ៍ដោយមិនចាំបាច់ឱ្យមានការចូលទស្សនាឡើយ។
ព្រឹត្តិការណ៍អូឡាំពិកទីក្រុងតូក្យូ ត្រូវបានពន្យារពេលមួយឆ្នាំដោយសារការរាតត្បាតកូវីដ-១៩ តែឥឡូវនេះនឹងត្រូវធ្វើឡើងដោយគ្មានអ្នកចូលទស្សនាក្នុងពិធីបើកក៏ដោយ ហើយសូម្បីពលរដ្ឋនៅក្នុងតំបន់នោះក៏ដោយ ក៏ពួកគេអាចមើលព្រឹត្តិការណ៍លើកញ្ចក់ទូរទស្សន៍តាមផ្ទះ ឬក៏ត្រូវកំណត់ចំនួនឱ្យចូលទស្សនាដែរ។
ចំពោះពហុកីឡាដ្ឋាននៅក្នុងក្រុង Fukushima, Miyagi និង Shizuoka នឹងត្រូវបានអនុញ្ញាតឱ្យមានអ្នកទស្សនារហូតបានត្រឹមតែ ១ម៉ឺននាក់ប៉ុណ្ណោះ។
ដោយឡែកពហុកីឡាដ្ឋាននៅក្រុង Ibaraki នឹងអនុញ្ញាតឱ្យតែកុមារចូលរួមតែប៉ុណ្ណោះ។ អាជ្ញាធរ Sapporo ដែលនឹងធ្វើជាម្ចាស់ផ្ទះកីឡាម៉ារ៉ាតុង នៅមិនទាន់សម្រេចចិត្តអំពីការបើកឱ្យមានអ្នកទស្សនានៅឡើយទេ។
ប្រធានរៀបចំព្រឹត្តិការណ៍ក្រុងតូក្យូ ឆ្នាំ២០២០ លោក Seiko Hashimoto បានថ្លែងនៅក្នុងសន្និសីទសារព័ត៌មានថា លោកពិតជាសោកស្តាយចំពោះប្រជាជនទាំងអស់ដែលខកចិត្តដោយមិនត្រូវបានឱ្យចូលទស្សនា។ លោកសង្ឃឹមថា ពលរដ្ឋនឹងយល់ពីជម្រើសដ៏លំបាកដែលក្រុងតូក្យូកំពុងជួបផលវិបាក។
សារព័ត៌មាន Nikkei Asia បានរាយការណ៍ថា អ្នករៀបចំការប្រកួតបានសម្រេចចិត្តដូចនេះ គឺរហូតពេលយប់បន្ទាប់ពីបានប្រជុំរយៈពេល ៥ដងជាមួយរដ្ឋាភិបាល និងអាជ្ញាធរក្រុងតូក្យូ ហើយការសម្រេចដូចនេះ ធ្វើឡើងប៉ុន្មានម៉ោងបន្ទាប់ពីនាយករដ្ឋមន្ត្រីជប៉ុន Yoshihide Suga បានប្រកាសអំពីវិធានការបន្ទាន់សម្រាប់ទីក្រុងតូក្យូ ក្នុងការទប់ស្កាត់ជំងឺកូវីដ គឺមានរយៈពេលរហូតដល់ថ្ងៃទី២២ ខែសីហា គឺមានន័យថា វិធានការនេះបិទបញ្ចប់មុន ២ថ្ងៃប៉ុណ្ណោះនៃការប្រកួតកីឡាអូឡាំពិករដូវក្តៅត្រូវប្រព្រឹត្តទៅនៅថ្ងៃទី២៤ សីហា។
ថ្លែងក្នុងកិច្ចប្រជុំនេះ ប្រធានគណៈកម្មាធិការអូឡាំពិកអន្តរជាតិ លោក Thomas Bach និយាយថា អ្នករៀបចំកម្មវិធីមានសិទ្ធិចំពោះលទ្ធភាពនៃការមិនឲ្យមានការទស្សនាដោយផ្ទាល់ គឺដោយសារតែបារម្ភអំពីស្ថានភាពឆ្លងកូវីដជាមួយនឹងការប្រព្រឹត្តទៅរបស់កីឡាករប្រកួតដោយសុវត្ថិភាព។
ចំពោះសហរដ្ឋអាមេរិកវិញ ស្ត្រីទី១របស់ប្រធានាធិបតី បៃដិន គឺលោកស្រី Jill Biden ក៏នឹងចូលទស្សនាផ្ទាល់ក្នុងព្រឹត្តិការណ៍ដែរ។ សេតវិមានបានជំរុញឱ្យរដ្ឋាភិបាលជប៉ុនត្រូវមានវិធានការសមស្របចំពោះសុវត្ថិភាពសុខភាពរបស់កីឡាករ និងភ្ញៀវកិត្តិយស។
កាលពីឆ្នាំ២០២០ អ្នករៀបចំព្រឹត្តិការណ៍បានសម្រេចចិត្តដាក់អ្នកទស្សនាចំនួន ១ម៉ឺននាក់នៅតាមកន្លែងធំៗ និងហាមឃាត់ការលក់គ្រឿងស្រវឹងចំពេលព្រឹត្តិការណ៍កំពុងប្រព្រឹត្តទៅ។
ដើម្បីបង្កើតនូវព្រឹត្តិការណ៍នេះ គណៈកម្មាធិការរៀបចំ និងអ្នកឧបត្ថម្ភនៃក្រុមសាជីវកម្មជប៉ុនចំនួន ៦៨ក្រុមហ៊ុនដែលបានបញ្ចេញសាច់ប្រាក់ជាង ៣ពាន់លានដុល្លារសម្រាប់ការប្រកួតនេះ បានបង្ហាញក្តីសង្ឃឹមថាអ្នកទស្សនាក្នុងប្រទេស នឹងត្រូវបានអនុញ្ញាតឱ្យចូលទស្សនា តែពេលនេះ ពួកគេអាចនឹងខកបំណង។
នៅពេលចោទសួរដោយអ្នកសារព័ត៌មានអំពីព្រឹត្តិការណ៍ធំបែបនេះ លោកនាយករដ្ឋមន្ត្រីជប៉ុន Yoshihide Suga បាននិយាយថា ព្រឹត្តិការណ៍អូឡាំពិកសម្រាប់ឆ្នាំនេះ ធ្វើឡើងដើម្បីបំពេញឲ្យបានលក្ខខណ្ឌនៃរដូវកាលរបស់ព្រឹត្តិការណ៍នេះ ដែលចាំបាច់ត្រូវរឹតបន្តឹងអ្នកចូលទស្សនា។
តែយ៉ាងណា ការផ្ដល់ឱកាសឱ្យមានព្រឹត្តិការណ៍អូឡាំពិកធ្វើឡើងតាមការឱ្យយោបល់ពីក្រុមប្រឹក្សា និងអ្នកជំនាញផ្នែកសុខភាពប្រឆាំងនឹងជំងឺកូវីដ ដែលថាព្រឹត្តិការណ៍អាចប្រព្រឹត្តទៅបានក្នុងកម្រិតរឹតត្បិតការចូលទស្សនា ឬមិនចាំបាច់ឱ្យមានអ្នកទស្សនាចូលមើលផ្ទាល់នោះទេ។
សម្រាប់ទីក្រុងតូក្យូ ដែលមានប្រជាជន ១៤លាននាក់ ត្រូវបានដាក់ឱ្យស្ថិតនៅក្នុងស្ថានភាពគ្រាមានអាសន្ន ដោយសារការរាតត្បាតជំងឺកូវីដនេះ ៤លើកមកហើយ ខណៈការលើកពេលព្រឹត្តិការណ៍អូឡាំពិកអន្តរជាតិក៏បានលើកពេលមួយឆ្នាំមកហើយដែរ៕