ក្រុមបញ្ញវន្តខ្មែរនៅក្រៅស្រុកចោទថា រដ្ឋាភិបាលកម្ពុជាបានក្បត់ពលរដ្ឋខ្លួនឯងដោយមានចេតនាលាក់ជនអន្តោប្រវេសន៍វៀតណាមខុសច្បាប់ដែលកំពុងរស់នៅលើទឹកដីកម្ពុជា ដោយមិនអនុវត្តច្បាប់អន្តោប្រវេសន៍របស់ប្រទេស។
អ្នកវិភាគនយោបាយ សង្គម និងជាអនុប្រធានក្រុមប្រឹក្សាភិបាលនៃចលនានិស្សិតដើម្បីលទ្ធិប្រជាធិបតេយ្យ លោក គឹម សុខ បានថ្លែងទាំងហូរទឹកភ្នែកក្នុងកម្មវិធី Idea Talk នៃសារព័ត៌មាន The Cambodia Daily កាលពីរាត្រីថ្ងៃទី២១ ខែមិថុនា ថា ការរំលោភបំពានព្រំដែនកម្ពុជាពីបរទេសឈ្លានពានមិនអាចធ្វើឲ្យខ្មែរបាត់ប្រទេសនោះទេ ប៉ុន្តែការបង្ហូរជនជាតិវៀតណាមខុសច្បាប់ចូលកម្ពុជា គឺជាគ្រោះថ្នាក់យ៉ាងធំធេងដែលអាចឲ្យកម្ពុជាបាត់ឈ្មោះពីផែនទីពិភពលោកតែម្តង។
លោក គឹម សុខ សម្ដែងការព្រួយបារម្ភថា វិបត្តិអន្តោប្រវេសន៍វៀតណាមខុសច្បាប់លើទឹកដីកម្ពុជា គឺជាហានិភ័យធំណាស់សម្រាប់កម្ពុជា ព្រោះថាខ្មែរមានលោកនាយករដ្ឋមន្ត្រី ហ៊ុន សែន ជាជនជាតិខ្មែរផង នៅតែវៀតណាមអាចគ្រប់គ្រងលើវិស័យយោធា វិស័យសេដ្ឋកិច្ច និងនយោបាយរបស់កម្ពុជា ស្ទើរតែទាំងស្រុងទៅហើយ ចុះទម្រាំតែយូរឆ្នាំទៅ ពលរដ្ឋវៀតណាមដែលមានប័ណ្ណរស់នៅដោយស្របច្បាប់ក្លាយជានាយករដ្ឋមន្ត្រីខ្មែរ នោះទឹកដីកម្ពុជា និងពលរដ្ឋខ្មែរច្បាស់ជាវិនាសហិនហោច នឹងក្លាយជាជនអន្តោប្រវេសន៍លើទឹកដីខ្លួនឯងមិនខាន។
លោកបញ្ជាក់ថា ដើម្បីរក្សាអធិបតេយ្យភាពរបស់កម្ពុជា រដ្ឋាភិបាលលោក ហ៊ុន សែន មានតែជ្រើសតែមួយគត់ គឺអនុវត្តច្បាប់អន្តោប្រវេសន៍លើជនអន្តោប្រវេសន៍វៀតណាមខុសច្បាប់ ដែលកំពុងរស់នៅលើទឹកដីកម្ពុជា ដើម្បីបញ្ជូនពួកគេត្រឡប់ទៅប្រទេសកំណើតវិញ ត្បិតជនជាតិវៀតណាមខុសច្បាប់ដែលសុំសិទ្ធិរស់នៅកម្ពុជាទាំងនេះ មិនមែនកំពុងរស់នៅប្រទេសណាផ្សេងទេ គឺកំពុងតែនៅលើទឹកដីកម្ពុជាតែម្តង។
ការអះអាងនេះ ធ្វើឡើងដើម្បីរិះគន់រដ្ឋាភិបាលកម្ពុជាដែលបណ្តែតបណ្តោយឲ្យជនជាតិវៀតណាមខុសច្បាប់រស់នៅលើទឹកដីកម្ពុជាយ៉ាងអណាធិបតេយ្យ ដោយមិនអនុវត្តច្បាប់អន្តោប្រវេសន៍ ឬច្បាប់សញ្ជាតិលើពួកគេនោះទេ។
ស្ថានទូតវៀតណាមប្រចាំនៅកម្ពុជា បានសរសេរលើទំព័រ Facebook របស់ខ្លួនកាលពីថ្ងៃទី២០ ខែមិថុនា ថា ឯកអគ្គរដ្ឋទូតវៀតណាមប្រចាំនៅកម្ពុជា លោក វូ ហ្វាងម៉ិញ បានថ្លែងអំណរគុណយ៉ាងខ្លាំងដល់អគ្គនាយកនៃអគ្គនាយកដ្ឋានអន្តោប្រវេសន៍របស់កម្ពុជា លោក គៀត ច័ន្ទថារិទ្ធ ក្នុងការធានាផ្តល់ប័ណ្ណស្នាក់នៅអចិន្ត្រៃយ៍ដល់ប្រជាពលរដ្ឋដើមកំណើតវៀតណាម ដែលបានរស់នៅដោយស្របច្បាប់នៅកម្ពុជាក្នុងពេលបច្ចុប្បន្ននេះ។
ស្ថានទូតវៀតណាម បញ្ជាក់ថា ចំពោះពលរដ្ឋវៀតណាមដែលមានសិទ្ធិប្រើប្រាស់ប័ណ្ណស្នាក់នៅអចិន្ត្រៃយ៍ ជា ID ឬជាប័ណ្ណសម្គាល់ខ្លួន គឺត្រូវមានសិទ្ធិធ្វើប្រតិបត្តិការស៊ីវិលពេញលេញ ដូចជាអាចបើកគណនីនៅធនាគារ អាចទទួលប័ណ្ណបើកបរ អាចចុះឈ្មោះកំណើតសម្រាប់ទារក អាចចុះសំបុត្រអាពាហ៍ពិពាហ៍ អាចចុះបញ្ជីមរណភាព អាចបញ្ជូនកូនឲ្យទៅសាលារដ្ឋ ជាដើម និងអាចមានសិទ្ធិស្របច្បាប់ផ្សេងជាច្រើនទៀតដូចពលរដ្ឋខ្មែរដែរ។
ទាក់ទិននឹងបញ្ហានេះ កាលពីថ្ងៃទី២៦ ខែកុម្ភៈ ឆ្នាំ១៩៨៦ លោក ហ៊ុន សែន បានចេញសារាចរណែនាំមួយស្ដីពីការអនុវត្តគោលនយោបាយចំពោះជនជាតិវៀតណាម ដែលបានចូលទៅរស់នៅកម្ពុជា ដោយផ្តល់ដីធ្លី ទីជម្រក ឧបត្ថម្ភ ផ្តល់អត្តសញ្ញាណប័ណ្ណ ថែរក្សា និងផ្គត់ផ្គង់ ជាដើម ទៅលើជនជាតិវៀតណាមទាំងនោះដោយយកចិត្តទុកដាក់ជាទីបំផុត ដែលសារាចរនេះនៅតែមានសុពលភាពរហូតដល់សព្វថ្ងៃនេះផងដែរ។
ជុំវិញបញ្ហានេះ នាយកមជ្ឈមណ្ឌលសារព័ត៌មានដើមអម្ពិល ដែលស្និទ្ធនឹងនាយករដ្ឋមន្ត្រីកម្ពុជា លោក សយ សុភាព ធ្លាប់បានលើកឡើងកាលពីពេលថ្មីៗនេះថា អគ្គនាយកដ្ឋានអន្តោប្រវេសន៍ត្រូវតែពិនិត្យឲ្យបានហ្មត់ចត់ និងត្រូវដាក់ចេញនូវវិធានការស្រង់ស្ថិតិឲ្យបានលម្អិតចំពោះនិគមជនវៀតណាម ថាតើពួកគេចូលស្រុកខ្មែរតាំងពីពេលណា និងមានលិខិតឆ្លងដែនដែរឬទេ។
លោកសង្កត់ធ្ងន់ថា ប្រទេសថៃ មិនដែលផ្តល់សញ្ជាតិឱ្យនិគមជនជាតិវៀតណាម ឬចិន នោះទេ បើទោះបីជាជនជាតិទាំងនោះរស់នៅរាប់សិបឆ្នាំរហូតដល់ចាស់ស្លាប់ទៅវិញក៏ដោយ៕