ប្រធានគណបក្សសង្គ្រោះជាតិ ដែលកំពុងរងការរឹតត្បិតសេរីភាព អះអាងថា ប្រមុខការទូតនៃប្រទេសប្រជាធិបតេយ្យ នៅតែផ្តល់តម្លៃឲ្យរូបលោក បើទោះបីជារូបលោកត្រូវបានហាមឃាត់សិទ្ធិនយោបាយក្តី។
ការអះអាងនេះ ធ្វើឡើងបន្ទាប់ពីប្រធានបក្សប្រឆាំងរូបនេះបានជួបជាមួយឯកអគ្គរដ្ឋទូតប្រទេសបារាំង ប្រចាំនៅកម្ពុជា ដែលនឹងត្រូវបញ្ចប់អាណត្តិរបស់ខ្លួននៅក្នុងពេលដ៏ខ្លីខាងមុខនេះ។
មេដឹកនាំបក្សប្រឆាំងលោក កឹម សុខា បានសរសេរនៅលើគណនី Facebook របស់លោកនៅថ្ងៃទី១១ ខែមិថុនា នេះថា ប្រទេសប្រជាធិបតេយ្យដែលជាមិត្តរបស់កម្ពុជា នៅតែផ្តល់តម្លៃដល់រូបលោក និងនៅតែបន្តជួយដល់កម្ពុជា និងពលរដ្ឋខ្មែរតាមស្មារតីនៃកិច្ចព្រមព្រៀងសន្តិភាពទីក្រុងប៉ារីស ២៣ តុលា ឆ្នាំ១៩៩១ ជានិច្ច។ លោកអះអាងថា ក្នុងជំនួបជាមួយឯកអគ្គរដ្ឋទូតប្រទេសបារាំង ប្រចាំនៅកម្ពុជា បានផ្លាស់ប្ដូរទស្សនៈគ្នាទៅវិញទៅមក និងពិភាក្សាគ្នាលើកិច្ចការមួយចំនួនជុំវិញកិច្ចសហប្រតិបត្តិការរវាងប្រទេសទាំងពីរ ក៏ដូចជាសហគមន៍អឺរ៉ុបផងដែរ មុននឹងឯកអគ្គរដ្ឋទូតរូបនេះត្រូវបញ្ចប់អាណត្តិនៅកម្ពុជា និងវិលទៅប្រទេសបារាំង វិញនៅចុងខែមិថុនា នេះ។
លោក កឹម សុខា បញ្ជាក់ថា លោកបានជួបជាមួយតំណាងប្រទេសមហាអំណាចប្រជាធិបតេយ្យធំៗនៃសហភាពអឺរ៉ុប ជាបន្តបន្ទាប់ ដូចជាអាល្លឺម៉ង់ និងបារាំង ជាដើម ក្រោយពីជំនួបរបស់លោកជាមួយអនុរដ្ឋមន្ត្រីការបរទេសសហរដ្ឋអាមេរិក កាលពីដើមខែមិថុនា នេះ។
ក្នុងដំណើរទស្សនកិច្ចរយៈពេល ១ថ្ងៃ កាលពីថ្ងៃទី១ ខែមិថុនា ឆ្នាំ២០២១ អនុរដ្ឋមន្ត្រីការបរទេសសហរដ្ឋអាមេរិក អ្នកស្រី Wendy Sherman បានបង្ហាញពីការប្ដេជ្ញាចិត្តរបស់សហរដ្ឋអាមេរិក ចំពោះភាពចាំបាច់នៅអាស៊ានក្នុងការរកដំណោះស្រាយបញ្ហាកម្រិតទ្វេភាគី និងតំបន់ នៅពេលបច្ចុប្បន្ននេះ។ ក្នុងដំណើរទស្សនកិច្ចនោះ អ្នកស្រីបានទៅជួបប្រធានគណបក្សសង្គ្រោះជាតិ លោក កឹម សុខា ផងដែរ បន្ទាប់ពីជួបជាមួយលោកនាយករដ្ឋមន្ត្រី ហ៊ុន សែន រួច។
ប្រធានគណបក្សសង្គ្រោះជាតិ លោក កឹម សុខា ត្រូវបានសមត្ថកិច្ចក្រុងភ្នំពេញចាប់ខ្លួនកាលពីថ្ងៃទី៣ ខែកញ្ញា ឆ្នាំ២០១៧ ដោយចោទពីបទក្បត់ជាតិតាមប្រសាសន៍របស់លោក ហ៊ុន សែន ប៉ុន្តែរហូតមកទល់នឹងពេលនេះ លោកនៅតែមានភាពស្អាតស្អំ ព្រោះលោកមិនទាន់ត្រូវបានតុលាការកាត់ទោសពីបទល្មើសណាមួយនៅឡើយទេ។
ទាក់ទិននឹងបញ្ហានេះ កាលថ្ងៃទី១២ ខែមេសា ឆ្នាំ២០២១ ឯកអគ្គរដ្ឋទូតប្រទេសអូស្ត្រាលី ប្រចាំនៅកម្ពុជា លោក ប៉ាប់ប្លូ កាំង បានអះអាងថា លោកនឹងបន្តធ្វើការតស៊ូមតិដើម្បីរកដំណោះស្រាយឱ្យបានទាន់ពេលវេលា និងប្រកបដោយតម្លាភាពលើស្ថានការណ៍បច្ចុប្បន្នរបស់ប្រធានបក្សប្រឆាំង លោក កឹម សុខា ផងដែរ៕