មន្ត្រីជាន់ខ្ពស់គណបក្សសង្គ្រោះជាតិភាគីលោក សម រង្ស៊ី អះអាងថា លុយសម្រាប់បង្កើតទូរទស្សន៍ព្រះអាទិត្យជាង ៧០ម៉ឺនដុល្លារនឹងមិនបាត់ទៅណាទេ ប្រសិនបើលោក ហ៊ុន សែន អនុញ្ញាតឲ្យមានអាជ្ញាប័ណ្ណបង្កើតទូរទស្សន៍ព្រះអាទិត្យដូចការសន្យារបស់គាត់មែននោះ។
ការអះអាងនេះ ធ្វើឡើងបន្ទាប់ពីមន្ត្រីបក្សប្រឆាំងមួយចំនួនបានជំរុញឲ្យលោក យឹម សុវណ្ណ និងលោក គី វណ្ណដារ៉ា ដែលជាមន្ត្រីជាន់ខ្ពស់បក្សសង្គ្រោះជាតិភាគីលោក សម រង្ស៊ី បង្ហាញពីលុយទូរទស្សន៍ព្រះអាទិត្យដែលពួកគាត់បានដកចេញពីគណនេយ្យធនាគារបាត់ស្រមោលសូន្យឈឹងអស់រាប់ឆ្នាំកន្លងមកនេះ។
អនុប្រធានគណបក្សប្រឆាំង អ្នកស្រី មូរ សុខហួរ បានផ្សាយផ្ទាល់តាមគណនី Facebook របស់អ្នកស្រីកាលពីម្សិលមិញនេះបានលើកឡើងថា លុយដែលជាញើសឈាមរបស់អ្នកចូលរួមបង្កើតទូរទស្សន៍ព្រះអាទិត្យជាង ៧០ម៉ឺនដុល្លារអាមេរិក មិនបានបាត់ទៅណានោះទេ ប៉ុន្តែដើម្បីឲ្យដឹងថាលុយទាំងនេះនៅឯណា ទាល់តែរដ្ឋាភិបាលលោក ហ៊ុន សែន ផ្តល់អាជ្ញាប័ណ្ណឲ្យបង្កើតទូរទស្សន៍ព្រះអាទិត្យនេះជាមុនសិន។
អនុប្រធានគណបក្សប្រឆាំងរូបនេះអះអាងថា អ្នកស្រីក៏បានដឹងរឿងលុយបង្កើតទូរទស្សន៍នេះដែរ ដូច្នេះអ្នកស្រីហ៊ានធានាថា លុយទាំងនោះមិនបានបាត់ទៅណាទេ ហើយមូលនិធិទាំងនេះនឹងលេចឡើងមកវិញមួយរំពេចនៅពេលណារដ្ឋាភិបាលកម្ពុជា ពិតជាហ៊ានផ្តល់សិទ្ធិតាមផ្លូវច្បាប់ឲ្យមានទូរទស្សន៍ព្រះអាទិត្យមែននោះ។
គណបក្សសង្គ្រោះជាតិ បានបើកយុទ្ធនាការមួយកាលពីឆ្នាំ២០១៥ ប្រមូលជំនួយពីសាធារណជនដើម្បីបង្កើតទូរទស្សន៍ព្រះអាទិត្យ ឬ SUN TV។ ក្នុងយុទ្ធការនោះ គណបក្សសង្គ្រោះជាតិទទួលបានប្រាក់ចូលរួមពីសមាជិករបស់ខ្លួនដែលរស់នៅក្នុងស្រុក និងក្រៅស្រុក មានចំនួនជាង ៧០ម៉ឺនដុល្លារអាមេរិក។
ប៉ុន្តែមកទល់នឹងពេលនេះ លុយដែលរៃអង្គាសបាននោះមិនដឹងចាត់ចែងរបៀបណានៅឡើយទេ ចំណែកគម្រោងបង្កើតទូរទស្សន៍នេះក៏ស្ងាត់បាត់ឈឹងទៅវិញដែរ។
អតីតមន្ត្រីជាន់ខ្ពស់គណបក្សប្រឆាំង លោក មុត ចន្ថា បានប្រាប់សារព័ត៌មាន The Cambodia Daily នៅថ្ងៃទី៨ ខែមិថុនា នេះថា ការលើកឡើងរបស់អ្នកស្រី មូរ សុខហួរ គ្រាន់តែជាការបោកប្រាស់ប៉ុណ្ណោះ ព្រោះថាការធានាអះអាងថាលុយមូលនិធិមិនបាត់បង់ដោយសំអាងលើមាត់ទទេ មិនអាចជឿជាក់ និងយកជាការបាននោះទេ ដូច្នេះពួកគេត្រូវតែបង្ហាញរបាយការណ៍ពីធនាគារ ឬ Bank statement ជាសាធារណៈ ទើបការលើកឡើងនេះចាត់ទុកជាការពិត។
លោកអះអាងថា ការលើកឡើងដោយមិនបង្ហាញរបាយការណ៍ធនាគារ (Bank statement) ដែលអាចបញ្ជាក់ពីតុល្យការសាច់ប្រាក់ទាំងការទាំងដើមបែបនេះ គឺមានន័យថា ជាការកុហក។ ជាងនេះទៀត មូលនិធិនេះមិនអាចត្រូវបានយកទៅប្រើប្រាស់សម្រាប់គម្រោងអ្វីផ្សេងបានទេ ដូច្នេះគ្រាន់តែបង្ហាញទៅដល់អ្នកចូលរួមពីរបាយការណ៍ធនាគារថា លុយទាំងនោះពិតជានៅក្នុងធនាគារមែន នោះអ្នកចូលរួមនឹងអស់ចម្ងល់ជាមិនខាន។
លោក មុត ចន្ថា បញ្ជាក់ថា មូលនិធិទូរទស្សន៍ព្រះអាទិត្យ ៧០ម៉ឺនដុល្លារនេះ បើគិតមកដល់ពេលនេះបានកើនឡើងជិត ១លានដុល្លារ ហើយបើបូកទាំងអត្រាការប្រាក់ផងនោះ។
ហើយលុយនេះគ្មាននរណាមានសិទ្ធិយកទៅប្រើប្រាស់សម្រាប់គណបក្សថ្មីបានទេ ព្រោះមូលនិធិទូរទស្សន៍ព្រះអាទិត្យនេះ គឺសម្រាប់តែគណបក្សសង្គ្រោះជាតិមួយប៉ុណ្ណោះ។
ពាក់ព័ន្ធនឹងបញ្ហានេះ ក្នុងលក្ខខណ្ឌរបស់គណបក្សប្រឆាំងក្នុងការគ្រប់គ្រងមូលនិធិព្រះអាទិត្យបានបញ្ជាក់ មានតែមន្ត្រីជាន់ខ្ពស់បក្សប្រឆាំង ៣រូបប៉ុណ្ណោះដែលមានសិទ្ធិចុះហត្ថលេខាលើសែក (Cheque) ដើម្បីដកប្រាក់មូលនិធិទូរទស្សន៍ព្រះអាទិត្យពីធនាគារ នោះគឺប្រធានគណបក្សប្រឆាំង លោក កឹម សុខា ប្រធានគណៈកម្មាធិការប្រតិបត្តិ លោក យឹម សុវណ្ណ និងអគ្គហិរញ្ញិកគណបក្ស លោក គី វណ្ណដារ៉ា។
លោក មុត ចន្ថា ធ្លាប់អះអាងថា មូលនិធិបង្កើតទូរទស្សន៍ព្រះអាទិត្យ ត្រូវបានគេដកចេញពីគណនេយ្យធនាគារស្ងាត់បាត់ឈឹង ស្របពេលដែលលោក កឹម សុខា កំពុងជាប់ឃុំនៅក្នុងពន្ធនាគារត្រពាំងផ្លុង ខេត្តត្បូងឃ្មុំ ខណៈអ្នកដែលមានសិទ្ធិចុះហត្ថលេខាដកប្រាក់មូលនិធិទាំងនោះពីគណនេយ្យធនាគារបាន មានតែលោក យឹម សុវណ្ណ និងលោក គី វណ្ណដារ៉ា ប៉ុណ្ណោះ៕