ចៅសង្កាត់សិត្បូ ក្រុងតាខ្មៅ ខេត្តកណ្តាល បានផ្ញើរបាយការណ៍មួយទៅអភិបាលក្រុងតាខ្មៅ ដោយថា មានករណីអ្នកឆ្លងជំងឺកូវីដ១៩ម្នាក់ ទើបនឹងពិនិត្យឃើញផ្ទុកជំងឺនេះ បានប្រាស្រ័យ និងប៉ះពាល់មនុស្សជាច្រើននាក់ មុនពេលអ្នកជំងឺរូបនោះរកឃើញថាមានវិជ្ជមានកូវីដ១៩នោះ។
ក្នុងលិខិតរបស់ចៅសង្កាត់សិត្បូ លោក អ៊ុំ ឡេង នៅថ្ងៃទី១០ខែកក្កដានេះ ដែលរាយការណ៍ទៅអភិបាលក្រុងតាខ្មៅ អះអាងថាស្ត្រីខ្មែរម្នាក់ជាកងទ័ពខៀវកម្ពុជា ទើបត្រឡប់មកពីបំពេញបេសកកម្មនៅប្រទេសម៉ាលី ទើបធ្វើតេស្តរកឃើញថាមានវីរុសកូវីដ១៩។ ក្នុងលិខិតដដែលបន្តថា មុនពេលស្ត្រីរូបនោះរកឃើញជំងឺនេះ គាត់បានរស់នៅជុំគ្រួសារ និងប្រាស័្រយទាក់ទងមនុស្សជាច្រើន ដែលធ្វើឱ្យពលរដ្ឋក្នុងភូមិមានការបារម្ភជាខ្លាំង។បញ្ហានេះ ចៅសង្កាត់បានស្នើឱ្យអភិបាលក្រុងជួយចាត់វិធានការបន្ត ដើម្បីឆ្លើយតបទៅនឹងក្តីបារម្ភរបស់ពលរដ្ឋទាំងនោះ។
យ៉ាងនេះក្តីនៅថ្ងៃចន្ទនេះ មន្ទីរសុខាភិបាលខេត្តកណ្តាល បានចេញសេចក្តីជូនដំណឹងមួយ ដោយបដិសេធ ចំពោះរបាយការណ៍របស់ចៅសង្កាត់សិត្បូលោក អ៊ុំ ឡេង ។សេចក្តីជូនដំណឹងនោះ បានអះអាងថា ករណីដែល លោក អ៊ុំ ឡេង ចៅសង្កាត់សិត្បូ បានធ្វើរបាយការណ៍ជូន លោកអភិបាលក្រុងតាខ្មៅ ស្ដីអំពីសកម្មភាពរបស់ អ្នកជំងឺកូវីដ១៩ រស់នៅភូមិព្រែកត្រែង សង្កាត់សិត្បូ ដែលទើបនឹងរកឃើញថ្មី កាលថ្ងៃទី០៨ ខែសីហា ថា បានធ្វើសកម្មភាព ប្រាស្រ័យទាក់ទងមនុស្សជាច្រើន គឺមិនត្រឹមត្រូវឡើយ។
មន្ទីរសុខាភិបាលបញ្ជាក់ថា របាយការណ៍របស់ចៅសង្កាត់សិត្បូ គ្មានប្រភពច្បាស់លាស់ខុសពីការចុះធ្វើអង្កេត ស្រាវជ្រាវរបស់មន្ត្រីជំនាញសុខាភិបាល និងការសហការផ្តល់ព័ត៌មានពីអ្នកជំងឺ និងក្រុមគ្រួសាររបស់គាត់ផ្ទាល់។លិខិតជូនដំណឹងបន្ថែមថា ក្រោយពីអ្នកជំងឺខាងលើទទួលលទ្ធផល តេស្តមេរោគកូវីដ១៩ វិជ្ជមានពីស្ត្រីរូបនោះក្រុមការងារបានចុះយកសំណាក ដើម្បីធ្វើតេស្តរកមេរោគកូវីដ១៩ ដល់សមាជិកក្រុមគ្រួសារអ្នកជំងឺ ដែលរស់នៅក្នុងផ្ទះជាមួយគ្នា ចំនួន៩នាក់ កាលពីថ្ងៃទី៩ ខែសីហា ឆ្នាំ២០២០ ហើយលទ្ធផលតេស្តពីវិទ្យាស្ថានប៉ាស្ទ័រ បញ្ជាក់ថា អវិជ្ជមាន ទាំង ០៩នាក់។
យ៉ាងណាក្តី មន្ទីរសុខាភិបាលខេត្តកណ្តាលអះអាងថា អ្នកទាំង៩នាក់ បាននិងកំពុងដាក់ឱ្យធ្វើចត្តាឡីស័ក រយៈពេល១៤ថ្ងៃ នៅមណ្ឌលចត្តាឡីស័កក្នុងក្រុងតាខ្មៅ ដើម្បីបន្ត តាមដានបន្ថែមទៀត។លើសពីនេះ មន្ត្រីសុខាភិបាល នឹងសហការជាមួយអាជ្ញាធរ អ្នកជំងឺ និងក្រុមគ្រួសារគាត់ ដើម្បីស្រាវជ្រាវ អង្កេតរកអ្នកប៉ះពាល់ ដោយប្រយោលផ្សេងទៀត ផងដែរ។ គិតត្រឹមថ្ងៃទី១០ខែសីហា កម្ពុជារកឃើញអ្នកឆ្លងមេរោគកូវីដ១៩ ចំនួន២៥១នាក់ ក្នុងនោះអ្នកជាសះស្បើយចំនួន២១៩នាក់៕