នៅក្នុងមហាសន្និបាទរំលឹកខួបលើកទី៦៨ឆ្នាំនៃថ្ងៃបង្កើតគណបក្សប្រជាជនកម្ពុជា នៅព្រឹកនេះ លោកនាយករដ្ឋមន្រ្តីហ៊ុន សែនដែលជាប្រធានគណបក្សប្រជាជនកម្ពុជាផងនោះ បានបង្ហាញអំពីប្រវត្តិ នៃសកម្មភាពនយោបាយរបស់គណបក្សប្រជាជនកម្ពុជា ដែលដឹកនាំប្រកបដោយភាពក្លាហាន ឥតរាថយនៅគ្រប់ដំណាក់កាលធំៗនៃប្រវត្តិសាស្ដ្រ។
លោកបានលើកឡើងថា គណបក្សមួយនេះមានប្រភពកើតចេញពីចលនាតស៊ូស្នេហាជាតិរបស់ប្រជាជនកម្ពុជាដើម្បីប្រឆាំងអាណានិគមនិយមបារាំងដើម្បីឯករាជ្យជាតិ ហើយបានពុះពារឆ្លងកាត់រាល់ឧបសគ្គច្រើនរាប់មិនអស់នៅលើកំណាត់ផ្លូវយ៉ាងវែងឆ្ងាយ រហូតធ្វើឱ្យប្រទេសជាតិនិងប្រជាជនទទួលបាននូវសន្តិភាព និងមានការអភិវឌ្ឍន៍ប្រកបដោយមោទនភាពជាទីបំផុត។
លោកបញ្ជាក់ថា គណបក្សនេះត្រូវបានបង្កើតឡើងកាលពីថ្ងៃទី២៨ខែមិថុនា ឆ្នាំ១៩៥១និងបានប្តូរឈ្មោះមកជាគណបក្សប្រជាជនកម្ពុជានៅឆ្នាំ១៩៩១ ប៉ុន្តែប្រធានគណបក្សរូបនេះមិនបានបង្ហាញពីសាវតាលម្អិតនៃបក្សរបស់ខ្លួនឡើយ។
ឯកសារប្រវត្តិសាស្ត្ររបស់ប្រវត្តិវិទូមួយចំនួន រួមមានលោកដេវីត ឆានល័រ(Devid Chandler)ជាដើមបានឱ្យដឹងថា គណបក្សប្រជាជនកម្ពុជាត្រូវបង្កើតឡើងនៅថ្ងៃទី ២៨ខែមិថុនាឆ្នាំ១៩៥១។ គណបក្សនេះមានឈ្មោះដើមថា បក្សប្រជាជនបដិវត្តន៍ខ្មែរ ត្រូវបានបង្កើតឡើងដោយលោកសឺន ង៉ុកមិញហៅអាចារ្យ មៀន ដែលមានស្រុកកំណើតនៅកម្ពុជាក្រោម និងជាអតីតសមាជិកបក្សកុម្មុយនីស្តឥណ្ឌូចិនដែលត្រូវបានបង្កើតឡើងដោយលោកហូ ជី មិញ(Ho Chi Minh)តាំងពីឆ្នាំ១៩៣០។
បក្សប្រជាជនបដិវត្តន៍ខ្មែរ បង្កើតឡើងដោយមានការជួយជ្រោមជ្រែងពីយួនកុម្មុយនីស្តវៀតមិញដើម្បីបណ្ដេញអាណានិគមនិយមបារាំងចេញឲ្យអស់ពីភូមិភាគឥណ្ឌូចិន។ ចលនានេះបានធ្វើការតស៊ូជារបៀបទ័ពព្រៃប្រឆាំងបារាំង រហូតដល់ឆ្នាំ១៩៥៤។
ក្រោយមកមហាក្នុងសន្និបាតបក្សលើកទី២ បក្សមួយនេះ ត្រូវបានសម្រេចប្តូរឈ្មោះទៅជាបក្សពលករកម្ពុជា នាខែកញ្ញាឆ្នាំ១៩៦០ ក្រោមការដឹកនាំរបស់ លោកទូ សាមុត ជាលេខាបក្សពេលនោះ។
នៅឆ្នាំ១៩៦២ លោកទូ សាមុតឬអាចារ្យសុខដែលមានស្រុកកំណើតនៅកម្ពុជាក្រោមដែរនោះ ត្រូវបានបាត់ខ្លួននៅរាជធានីភ្នំពេញយ៉ាងអាថ៌កំបាំង។
ក្រោយមកនៅខែកុម្ភៈឆ្នាំ១៩៦៣ បក្សពលករកម្ពុជាបានធ្វើមហាសន្និបាតបក្សជាលើកទី៣ ដោយអង្គមីទ្ទីងពេលនោះសម្រេចតែងតាំង លោកសាឡុត ស ហៅ ប៉ុល ពត ឲ្យធ្វើជាអគ្គលេខាធិការបក្ស។ ៣ឆ្នាំ ក្រោយមកពោលគឺនៅឆ្នាំ១៩៦៦ ដោយចង់ផ្តាច់ខ្លួនចេញពីបក្សកុម្មុយនីស្តរៀតណាម ប៉ុល ពតបានសម្រេចប្តូរឈ្មោះបក្សរបស់ខ្លួនពីបក្សពលករកម្ពុជាទៅជាបក្សកុម្មុយនីស្តកម្ពុជា តែម្តង។
បក្សកុម្មុយនីស្តកម្ពុជាឬក្រុមខ្មែរក្រហម ដែលដឹកនាំដោយ ប៉ុល ពត ឬបងធំទី១ នេះ បានគ្រប់គ្រងប្រទេសកម្ពុជាក្រោយការផ្តួលរំលំរបបសាធារណរដ្ឋខ្មែររបស់លោកសេនាប្រមុខលន់ នល់ ពីខែមេសាឆ្នាំ ១៩៧៥ រហូតដល់ថ្ងៃទី៧ខែមករាឆ្នាំ១៩៧៩នៅពេលដែលវៀតណាម លើកទ័ពចូលឈ្លានពានកម្ពុជា រួចលើកបន្តុបរដ្ឋាភិបាលថ្មីឬរដ្ឋាភិបាលអាយ៉ងពេលនោះដោយមានសមាសភាពខ្មែរកុម្មុយនីស្ត និងកម្មាភិបាលខ្មែរក្រហមមួយចំនួនដូចជា លោកប៉ែន សុវណ្ណលោកចាន់ ស៊ី លោកហ៊ុន សែន លោកជា ស៊ីមនិងលោកហេង សំរិនជាដើម។
នៅខែមករាឆ្នាំ១៩៧៩ រណសិរ្សសាមគ្គីសង្គ្រោះជាតិកម្ពុជាដែលបង្កើតឡើងកាលពីថ្ងៃទី២ខែធ្នូឆ្នាំ១៩៧៨នោះ បានរៀបចំមហាសន្និបាតបក្សកុម្មុយនីស្តកម្ពុជា ដោយរៀបចំរចនាសម្ព័ន្ធដឹកនាំបក្សនេះឡើងវិញ ដោយសម្រេចប្តូរឈ្មោះយកឈ្មោះដើមវិញគឺបក្សប្រជាជនបដិវត្តន៍ខ្មែរ និងប្រើប្រាស់ឈ្មោះដើមនេះចាប់តាំងពីខែមករាឆ្នាំ១៩៧៩ រហូតដល់ឆ្នាំ១៩៩១ នៅពេលដែលឈ្មោះនេះត្រូវបានគេប្ដូរទៅជាគណបក្សប្រជាជនកម្ពុជាដើម្បីលាងខ្លួនឱ្យស្អាត ដោយមិនចង់ឱ្យគេដឹងអំពីឫសកែវកុម្មុយនីស្ត និងខ្មែរក្រហមរបស់ខ្លួន ហើយឈ្មោះបក្សថ្មីនេះត្រូវបានគេស្គាល់រហូតមកទល់ពេលបច្ចុប្បន្ន។
អគ្គលេខាធិការបក្សនេះរួមមាន លោកប៉ែន សុវណ្ណត្រូវបានគណបក្សជ្រើសតាំងចាប់ពីឆ្នាំ១៩៧៩ រហូតដល់ពេលលោកត្រូវបានវៀតណាមចាប់ខ្លួននៅឆ្នាំ១៩៨១។ បន្ទាប់មកលោកហេង សំរិនដឹកនាំបន្តរហូតដល់ឆ្នាំ១៩៩១។ ហើយលោកជា ស៊ីមក៏បានដឹកនាំពីឆ្នាំ១៩៩១ រហូតទល់ពេលលោកទទួលមរណភាពនៅថ្ងៃទី៨ខែមិថុនាឆ្នាំ២០១៥។ ចាប់ពីថ្ងៃទី២០មិថុនា២០១៥ តំណែងជាអគ្គលេខាបក្សឬជាប្រធានបក្សប្រជាជនកម្ពុជា ត្រូវបានទៅលើកណ្តាប់ដៃរបស់លោកហ៊ុន សែនដឹកនាំរហូតមកទល់ពេលបច្ចុប្បន្ន៕