សកម្មជនបរិស្ថានបានអះអាងថា សំណង់អគារធំៗចំនួន៥ នៅខេត្តព្រះសីហនុត្រូវបានសាងសង់ឡើងដោយខុសច្បាប់និងផ្ទុយពីសារាចររបស់រដ្ឋាភិបាល។
វីដេអូដែលបង្ហោះនៅលើទំព័រហ្វេសប៊ុកអង្គការមាតាធម្មជាតិយុវជនស្រឡាញ់បរិស្ថាន លោកលី ចាន់ដារ៉ាវុធបានលើកឡើងថា គ្រាន់តែនៅតំបន់ឆ្នេរឯករាជ្យមួយប៉ុណ្ណោះគឺមានសំណង់អគារចំនួន៥ បានសាងសង់ដោយខុសច្បាប់ និងផ្ទុយពីសារាចរណ៍ណែនាំស្តីពីការអភិវឌ្ឍតំបន់ឆ្នេរសមុទ្ររបស់កម្ពុជា។ សារាចរណែនាំរបស់រដ្ឋាភិបាលស្តីពីការអភិវឌ្ឍតំបន់ឆ្នេរសមុទ្ររបស់កម្ពុជាកាលពីឆ្នាំ២០១២ហាមដាច់ខាតមិនឲ្យមានការសាងសង់ណាមួយក្នុងចំងាយ ១០០ម៉ែត្រពីឆ្នេរសមុទ្រដោយគិតចាប់ពីចំណុចទឹកជោរនៃទឹកសមុទ្រ។
យុវជនលី ចាន់ដារ៉ាវុធបានអះអាងថា អគារចំនួន៥កំពុងសាងសង់នៅឆ្នេរឯករាជ្យ ដែលផ្ទុយពីសារាចររបស់រដ្ឋាភិបាល និងផ្ទុយពីរដ្ឋធម្មនុញ្ញ រួមមានសណ្ឋាគារ និងកាស៊ីណូ Xihaohui Palace ដែលបានសាងសង់ចម្ងាយតែ១៩ម៉ែត្រប៉ុណ្ណោះពីសមុទ្រ ឬកំរិតទឹកជោរ រីឯអគារយក្សឈ្មោះBlue Bayនៅកសាងចំងាយ៥៥ម៉ែត្រ។
ដោយឡែក សណ្ឋាគារនិងកាស៊ីណូខ្នាតយក្សឈ្មោះ Sunshine Bay កសាងចម្ងាយ៤៥ម៉ែត្រ និងសណ្ឋាគារ Novotel Holiday Palace សាងសង់ចម្ងាយ១៦ម៉ែត និងអគារកាស៊ីណូHoliday Palace កសាងចម្ងាយ១៨ម៉ែត្រពីកម្រិតទឹកជោរ។
យុវជនដដែលបញ្ជាក់ថា ការសាងសង់សំណង់ទាំងនោះ គឺធ្វើឡើងផ្ទុយពីរដ្ឋធម្មនុញ្ញ និងច្បាប់ភូមិបាលស្តីពីតំបន់ឆ្នេរ ហើយលោកក៏បានផ្ញើវីដេអូនេះទៅកាន់រដ្ឋមន្ត្រីក្រសួងរៀបចំដែនដី នគរូបនីយកម្មនិងសំណង់លោកជា សុផារ៉ាដោយចោទជាសំណួរថា ហេតុអ្វីបានជាមានការអនុញ្ញាតឱ្យមានការសាងសង់អគារទាំងនេះនៅតំបន់ឆ្នេរដីសាធារណៈរបស់រដ្ឋជាបន្តបន្ទាប់បាន?
យុវជនរូបនេះដាក់ការសង្ស័យថា នេះប្រហែលមកពីមូលហេតុអសមត្ថភាពរបស់លោកជា សុផារ៉ានិងការឃុបឃិតគ្នាដើម្បីលក់ដីឆ្នេរសមុទ្ររបស់យើងទាំងអស់គ្នាតែម្តង។ យ៉ាងណាមន្ត្រីនាំពាក្យសាលាខេត្តព្រះសីហនុលោកឃាង ភារម្យអះអាងថា ក្រុមការងារអន្តរក្រសួងកំពុងស្រាវជ្រាវអំពីបញ្ហាទាំងនេះ ដោយរង់ចាំមើលចំណាត់ការរបស់អាជ្ញាធររដ្ឋជុំវិញបញ្ហាទាំងនោះផងដែរ។
លោកនាយករដ្ឋមន្រ្តីហ៊ុន សែនបានបញ្ជាឲ្យរដ្ឋមន្ដ្រីក្រសួងរៀបចំដែនដីលោកជា សុផារ៉ាបង្កើតគណៈកម្មការជាតិបន្ទាន់មួយ ដើម្បីពិនិត្យមើលឡើងវិញ និងចាត់វិធានការតាមផ្លូវច្បាប់ ចំពោះសំណង់អគារទាំងឡាយនៅខេត្តព្រះសីហនុនិងត្រូវបញ្ឈប់ជាបន្ទាន់នូវរាល់សំណង់អគារដែលសាងសង់ឡើងដោយខុសច្បាប់។
ការបញ្ជារបស់លោកហ៊ុន សែននេះធ្វើឡើងក្រោយពេលមានព្រឹត្តិការណ៍បាក់រលំអគាររបស់ជនជាតិចិននៅខេត្តជាប់មាត់សមុទ្រនេះ កាលពីថ្ងៃទី២២មិថុនា ដែលបណ្តាលឱ្យពលរដ្ឋខ្មែរចំនួន២៨នាក់ស្លាប់ និងរងរបួសចំនួន២៦នាក់៕