អង្គការអន្តរជាតិមួយដែលមានឈ្មោះថា អង្គការអ្នកសារព័ត៌មានគ្មានព្រំដែន ឬ Reporters Without Borderទាមទារឱ្យតុលាការកម្ពុជាទម្លាក់ការចោទប្រកាន់លើសំណុំរឿងក្តីរបស់ប្រធានសហជីពគឺលោករ៉ាត់ រត្នមុនី។
អង្គការអ្នកសារព័ត៌មានគ្មានព្រំដែនកាលពីម្សិលមិញបានចេញសេចក្ដីថ្លែងការណ៍របស់ខ្លួនដោយបានរិះគន់ថា ចំណុចមួយចំនួនក្នុងសវនាការរបស់តុលាការកម្ពុជាមានការគាបសង្កត់ទៅភាគីដើមបណ្ដឹងទាំង៥រូប ហើយពួកគេបានផ្ដល់ចម្លើយផ្ទុយពីការណ៍ពិត ដើម្បីដាក់បន្ទុកទៅលើលោករ៉ាត់ រត្នមុនីទៅវិញ។
អង្គការអន្តរជាតិមួយនេះបានរិះគន់ចំពោះការដាក់តួនាទីលោករ៉ាត់ រត្នមុនីថា ជាអ្នកចូលរួមផលិតភាពយន្ដឯកសារ ខណៈលោកត្រឹមតែជាអ្នកបកប្រែ និងសម្របសម្រួលប៉ុណ្ណោះ ដោយថា ករណីនេះ ក៏ត្រូវបានបញ្ជាក់ច្បាស់ពីនាយកទូរទស្សន៍រុស្ស៊ីRT។បន្ថែមពីនេះ អង្គការអន្តរជាតិដដែលក៏បានលើកឡើងថា សវនាការលើសំណុំរឿងនេះមានភាពលម្អៀង និងអយុត្តិធម៌ផងដែរ។
កាលពីថ្ងៃទី១២ខែមិថុនា ចៅក្រមសាលាដំបូងរាជធានីភ្នំពេញ លោកកូយ សៅបានបើកសវនាការជំនុំជម្រះក្ដីប្រឆាំងលោករ៉ាត់ រត្នមុនីដោយក្នុងនោះមានទាំងភាគីដើមបណ្ដឹងរដ្ឋប្បវេណីចំនួន៥នាក់ ដែលសុទ្ធសឹងជាតួសម្ដែងនៅក្នុងភាពយន្ដឯកសារ«ម្ដាយខ្ញុំ លក់ខ្ញុំ»។ពួុកគេបានឆ្លើយដាក់បន្ទុកនិងចោទប្រកាន់លោករ៉ាត់ រត្នមុនីថា បានផ្ដល់លុយនិងសន្យាជួយអ្វីមួយដល់ពួកគេ ជាថ្នូរនឹងការចូលរួមសម្ដែងក្នុងរឿងនេះ។
បើតាមការគ្រោងទុក សាលាដំបូងរាជធានីភ្នំពេញគ្រោងប្រកាសសាលក្រមលើសំណុំរឿងលោករ៉ាត់ រត្នមុនី នាថ្ងៃទី២៦ខែមិថុនាឆ្នាំ២០១៩ខាងមុខ។ សេចក្ដីថ្លែងការណ៍ដដែលនោះបានទាមទារឱ្យ តុលាការកម្ពុជាដោះលែងលោករ៉ាត់ រត្នមុនីឲ្យមានសេរីភាពវិញ ដោយថា លោករ៉ាត់ រត្នមុនីគឺគ្រាន់តែបានចូលរួមបង្ហាញពន្លឺនៅក្នុងបទល្មើសជួញដូរផ្លូវភេទក្នុងកម្ពុជាតែប៉ុណ្ណោះ។
ភរិយារបស់លោករ៉ាត់ រត្នមុនី គឺអ្នកស្រីឡុង គឹមហ៊ាងបានលើកឡើងនៅថ្ងៃនេះថា អ្នកស្រីយល់ស្របចំពោះការលើកឡើងរបស់ អង្គការអ្នកសារព័ត៌មានគ្មានព្រំដែនហើយអ្នកស្រីក៏ស្នើឲ្យតុលាការកម្ពុជាទម្លាក់បទចោទ និងដោះលែងប្តីរបស់គាត់ផងដែរ។
កាលពីថ្ងៃទី៧ ធ្នូឆ្នាំមុន សមត្ថកិច្ចថៃបានចាប់បញ្ជូនលោករ៉ាត់ រត្នមុនី មកកម្ពុជាតាមការស្នើសុំរបស់កម្ពុជា ដោយរដ្ឋាភិបាលបានអះអាងថា រឿង«ម្តាយខ្ញុំ លក់ខ្ញុំ»ជាការធ្វើឱ្យប៉ះពាល់ធ្ងន់ធ្ងរដល់កិត្តិយសប្រទេសកម្ពុជា និងជាករណីមិនអាចអត់ឱនឲ្យបាន។
ប្រធានសហព័ន្ធសហជីពសំណង់កម្ពុជា លោករ៉ាត់ រត្នមុនីត្រូវបានតុលាការកម្ពុជាសម្រេចចោទប្រកាន់តាមមាត្រា៤៩៦នៃក្រមព្រហ្មទណ្ឌកម្ពុជាពីបទ«ញុះញង់ឲ្យមានការរើសអើង» ដែលអាចនឹងត្រូវជាប់ទោសក្នុងពន្ធនាគារពី១ឆ្នាំទៅ៣ឆ្នាំ៕