ក្រុមអ្នកសារព័ត៌មានជាង៥០នាក់នៅថ្ងៃទី២០ខែមិថុនានេះ បានរួមគ្នាសរសេរលិខិតចំហ ស្នើឲ្យសាលាឧទ្ធរណ៍ទម្លាក់ចោលបទចោទប្រកាន់ និងបញ្ចប់ការដាក់ឱ្យស្ថិតនៅក្រោមការតាមដានរបស់តុលាការលើអតីតបុគ្គលិកអាស៊ីសេរីពីររូប។
ក្រុមអ្នកសារព័ត៌មានបានលើកឡើងថា ការចោទប្រកាន់ទៅលើអតីតអ្នកសារព័ត៌មានអាស៊ីសេរីគឺជាការចោទប្រកាន់ដ៏«ធ្ងន់ធ្ងរ» ហើយថា ការចោទប្រកាន់បែបនេះកំពុងបង្កភាពភ័យខ្លាចដល់អ្នកសារព័ត៌មានដែលកំពុងបំពេញវិជ្ជាជីវៈ និងធ្វើឱ្យសេរីភាពសារព័ត៌មាននៅកម្ពុជាធ្លាក់ចុះ។
អ្នកសារព័ត៌មានលើកឡើងថា ដ្បិតអតីតបុគ្គលិករបស់អាស៊ីសេរី បានដោះលែងឱ្យនៅក្រៅឃុំក្តីប៉ុន្តែពួកគេនៅស្ថិតក្រោមការត្រួតពិនិត្យរបស់តុលាការដែលធ្វើឱ្យពួកគាត់ពិបាកក្នុងការរស់នៅនិងមិនអាចបំពេញការងារជាអ្នកកាសែតបន្តទៀតបាន។ លើសពីនេះ ពួកគេមិនអាចផ្លាស់ប្តូរទីលំនៅដោយគ្មានការអនុញ្ញាតពីចៅក្រមស៊ើបសួរ មិនអាចធ្វើដំណើរទៅក្រៅប្រទេស និងត្រូវបង្ហាញខ្លួនជារៀងរាល់ ខែនៅប៉ុស្តិ៍នគរបាលទៀតផង។
សំណើរបស់អ្នកសារព័ត៌មានបែបនេះ ធ្វើឡើងមួយថ្ងៃមុនសាលាឧទ្ធរណ៍គ្រោងនឹងបើកសវនាការជំនុំជម្រះបណ្តឹងទាស់របស់អតីតបុគ្គលិកអាស៊ីសេរីនៅថ្ងៃទី២១មិថុនាស្អែកនេះ។ អតីតអ្នកយកព័ត៌មានវិទ្យុអាស៊ីសេរីលោកអ៊ួន ឈិននិងលោកយាង សុធារិនហៅយាង សុជាមេត្តាត្រូវសាលាដំបូងរាជធានីភ្នំពេញចោទប្រកាន់តាមមាត្រា៤៤៥នៃក្រមព្រហ្មទណ្ឌពីបទ«ប្រគល់ឲ្យរដ្ឋបរទេសនូវព័ត៌មានជាអាទិ៍ដែលបង្កឲ្យមានការអន្តរាយដល់ការការពារជាតិ»។
ពួកគេត្រូវបានដោះលែងឱ្យនៅក្រៅឃុំ កាលពីចុងខែសីហា ឆ្នាំ២០១៨ កន្លងទៅក្រោយជាប់ពន្ធនាគារអស់រយៈពេលជាង៩ខែ។ ក៏ប៉ុន្តែសេរីភាពដែលទទួលបាននេះមានលក្ខណៈរឹតត្បិតនៅឡើយ ព្រោះតុលាការបានដាក់អ្នកទាំងពីរក្រោមការត្រួតពិនិត្យ និងមិនអនុញ្ញាតឱ្យធ្វើដំណើរទៅក្រៅប្រទេសឡើយហើយសម្ភារៈត្រូវបានរឹបអូសជាវត្ថុតាង។
ទាំងលោកអ៊ួន ឈិននិងលោកយាង សុធារិនសុទ្ធតែធ្លាប់លើកឡើងអំពីបញ្ហាប្រឈមក្នុងការរស់នៅ និងពិបាករកការងារធ្វើ ព្រោះតែស្ថិតនៅជាប់បណ្តឹងរបស់តុលាការនៅឡើយ។ ពួកគេបានស្នើឱ្យ តុលាការទម្លាក់ការចោទប្រកាន់ទាំងឡាយ ដោយថា ការបន្តដាក់ពួកគាត់ឱ្យស្ថិតនៅក្រោមការត្រួតពិនិត្យរបស់តុលាការ គឺធ្វើឱ្យប៉ះពាល់ធ្ងន់ធ្ងរដល់សេរីភាព និងជីវភាពរបស់ពួកគេ។
លោកសុធារិនដែលមានស្រុកកំណើតនៅកម្ពុជាក្រោមបានបង្ហាញការនឹករឭកស្រុកនិងគ្រួសារជាខ្លាំង ពិសេសចង់ទៅមើលឪពុកបង្កើតរបស់ខ្លួនដែលកំពុងមានជំងឺនៅឯកម្ពុជាក្រោមប៉ុន្តែខ្លួនមិនអាចទៅលេងឬមើលថែឪពុកបាន ព្រោះតែជាប់បម្រាមរបស់តុលាការ។
កាលពីម្សិលមិញ អង្គការឃ្លាំមើលសិទ្ធិមនុស្សអន្ដរជាតិ Human Rights Watchបានចេញសេចក្ដីថ្លែងការណ៍អះអាងថា អតីតបុគ្គលិកអាស៊ីសេរីទាំងពីររូបគឺជាជនរងគ្រោះ អំពីការវាយប្រហារមិនចេះចប់ពីសំណាក់លោកហ៊ុន សែន។
អង្គការអន្តរជាតិមួយនេះបានទាមទារឱ្យតុលាការទម្លាក់ការចោទប្រកាន់លើអតីតបុគ្គលិកវិទ្យុអាស៊ីសេរីពីររូបនិងបញ្ឈប់ការដាក់ឱ្យស្ថិតនៅក្រោមការត្រួតពិនិត្យតាមផ្លូវតុលាការបន្តទៀត៕