អតីតព្រះចៅអធិការវត្តច្បារអំពៅព្រះតេជព្រះគុណហោ សុខុនត្រូវបានគណៈសង្ឃទាំងពីរគណៈសម្រេចផ្សឹកនៅយប់ថ្ងៃទី១៣ខែកុម្ភៈនេះនៅវត្តបុទុមវតី ដោយអះអាងថា ព្រះសង្ឃអង្គនេះធ្វើខុសធម៌វិន័យសង្ឃ។
ក្រោយពេលបានផ្សឹករួចមិនបានមួយថ្ងៃផងព្រះតេជគុណហោ សុខុនក៏ត្រូវបានបញ្ចប់តួនាទីជាចៅអធិការវត្តច្បារអំពៅ និងបញ្ចប់តំណែងជាទីប្រឹក្សាសម្តេចព្រះសង្ឃរាជទេព វង្សនិងសង្ឃនាយកនន្ទ ង៉ែតផងដែរ។
ការសម្រេចបញ្ចប់តួនាទីនេះបានធ្វើឡើងតាមរយៈសេចក្តីសម្រេចមួយនៅថ្ងៃទី១៣ខែកុម្ភៈ ដោយមានការចុះហត្ថលេខាដោយសម្តេចព្រះសង្ឃរាជ ទេព វង្ស សម្តេចសង្ឃនាយកនន្ទ ង៉ែតរួមនិងលោកទេសរដ្ឋមន្ត្រីហឹម ឆែមរដ្ឋមន្ត្រីក្រសួងធម្មការ និងសាសនា។ ការសម្រេចផ្សឹកព្រះសង្ឃអង្គនេះធ្វើឡើងក្រោយពេលព្រះអង្គបានបញ្ចេញសាររិះគន់រដ្ឋាភិបាលជាច្រើន ពិសេសការរិះគន់បញ្ហា ដកប្រព័ន្ធអនុគ្រោះពន្ធEBAដោយសហគមន៍អឺរ៉ុប។
ចុងក្រោព្រះអង្គបានហៅលោកស ខេងរដ្ឋមន្រ្តីក្រសួងមហាផ្ទៃថាជាផ្កាយសំណាងកម្ពុជា ដែលជាអ្នកដឹកនាំឈាមត្រជាក់ គ្មានបាតដៃប្រឡាក់ឈាម។ ព្រះអង្គក៏បានគាំទ្រឱ្យលើកលោកស ខេង ជានាយករដ្ឋមន្ត្រីជំនួស លោកហ៊ុន សែនទើបអាចបញ្ចៀសបញ្ហាផ្ទៃក្នុង និងរួចផុតពីទណ្ឌកម្មសេដ្ឋកិច្ច។
ជាការឆ្លើយតបលោកស ខេងបានចេញសារព្រមានមួយថា ការសរសើរដល់រូបលោកនេះជាចេតនាបំបែកបំបាក់ផ្ទៃក្នុងរបស់គណបក្សប្រជាជនកម្ពុជា និងមានចេតនាមិនល្អ។ ចាប់តាំងពីពេលនោះមក ព្រះតេជព្រះគុណហោ សុខុនក៏ត្រូវបានចាប់ផ្សឹកទាំងកម្រោល ក្រោមហេតុផលថា បានប្រព្រឹត្តខុសធម៌វិន័យ នៃព្រះពុទ្ធសាសនាតែម្តង៕